لە دوای روخانی رژێمی بەشار ئەسەدەوە 7670 کەس لە سوریا کوژراون

 
روانگەی سوریی بۆ مافەکانی مرۆڤ بڵاویکردەوە؛ لە دوای روخانی رژێمی بەشار ئەسەدەوە، تائێستا 7670 کەس لە سوریا کوژراون، لەو ژمارەیەش 5784 کەسیان هاوڵاتی و 306 کەسیشیان منداڵن و رۆرژانەش ئەو ژماریە روو لە زیادبوونە.
بەپێی راپۆرتەکەی روانگەی سوری لەماوەی شەش مانگی رابردوودا لەو ژمارەیەی کوژراوان 75.4%ـی قوربانییەکان هاوڵاتی مەدەنیین و 24.6%ـی قوربانیەکانیش چەکدار و کەسانی هێزە ئەمنییەکانن، بەوەش دەردەکەوێت رێژە قوربانیی کەسانی مەدەنیی زۆر زیادیکردووە.
ئاشکرایشیکردوە: بەهۆی نەبوونی چاودێری ئاسایش و بەردەوامی تەقینەوەکان لە بازاڕ و شەقامەکان دەیان کەس کوژراون، هیچ کەسێکیش خۆی بە بەرپرسیاری ئەو هێرشانە دانانێت و  دۆخەکە کەشێکی تۆقێنەری لەناو دانیشتواندا دروست کردووە.
بەشێکی دیکەی راپۆرتەکەی روانگەی سوریی تەرخانکراوە، بۆ ئەنجامدانی کۆمەڵکوژیی و کوشتن و پێشێلکاریی لەسەر بنەمای تایفی و مەزهەبی کە بەهۆیەوە سەدان خێزان لەناوبراون و کۆمەڵکوژ کراون لەسەر بنەمای ئینتیما و مەزهەبەکانیان.