ڕووسیا دووەم گەورەترین شاری ئۆکرانیای بۆردوومان کرد

لە بەرەبەیانی ئەمڕۆوە هێزەکانی ڕووسیا شاری خارکێڤی ئۆکڕانیایان بۆردوومان کرد، سەرۆکی شارەوانیی ئەو شارەش ڕایدەگەیەنێت: لەو کاتەوەی شەڕی نێوان ڕووسیا و ئۆکرانیا دەستیپێکردووە بەم توندییە شارەکەمان نەکراوەتە ئامانج.
ئیگـۆر تیریـخــۆف سەرۆکی شارەوانیی خارکێڤ لەبارەی بۆردوومانكردنی شارەكەیان لەلایەن ڕووسیاوە ڕایگەیاند: لە بەرەبەیانی ئەمڕۆوە هێزەکانی ڕووسیا شارەكەیان بە مووشەک و فڕۆکەی بێفڕۆکەوان بۆردوومان کردوە .
لەم چەند هەفتەیەی دواییدا ڕووسیا و ئۆکراین لە حاڵێکدان کە لە بواری دانووستاندا هەوڵی دۆزینەوەی ڕێگەچارەیەک بۆ ئاشتی دەدەن، لە بەرەکانی جەنگیشدا هێرشە توندەکانیان بۆسەر یەکتری زیاتر کردووە .
سەرۆکی شارەوانیی خارکێڤ وتیشی: لەماوەی یەک سەعات و نیوی بۆردوومانەکەدا زیاتر لە ٤٠ تەقینەوە شارەکەمانی هەژاندووە.
ئەوەشیخستەڕوو: لە بۆردومانەكەدا ناوچەی نیشتەجێبوون کراوەتە ئامانج، کە بەهۆیانەوە پێنج هاووڵاتی كوژراون و ١٧ كەسی دیكەش برینداربوون.