عەممار حەکیم: پێویستە دامەزراوە حکومییەکان دووربن لە ململانێی هەڵبژاردن

عەممار حەکیم، سەرۆکی رەوتی حیکمەی نیشتمانی لە وتاری نوێژی جەژنی قوربان رایگەیاند، لەگەڵ نزیکبوونەوە لە کۆتاییهاتنی ئەم خولەی ئەنجوومەنی نوێنەرانی عێراق، ئامادەکارییەکان بۆ هەڵبژاردن دەستیانپێکردووە .
عەممار حەکیم ئاماژەی بۆئەوەشکرد، ئێمە نزیکین لە کۆتاییهاتنی ئەم خولەی ئەنجوومەنی نوێنەرانی عێراق، ئامادەکارییەکانیش بۆ ئەنجامدانی هەڵبژاردن دەستیپێکردووە، ئەوەش نیشاندەری چاکبوونەوەی سیستمی سیاسی و سەقامگیربوونی عێراقە لەرووی دیموکراسی بۆماوەی زیاد لە 22 ساڵ، ئێستا پێکهێنانی حکومەتەکان لە عێراق لەرێگەی سندوقەکانی دەنگدانەوەیە.
عەممار حەکیم وتیشی، هێشتا پێویستمان بەوەیە دامەزراوە حکومییەکان بەدووربخەین لە گرژیی و ململانێی هەڵبژاردن، پێویستە رکابەری لەچوارچێوەی بەرنامەی پەرەپێدان بێت، کە رێگە خۆشکەربێت بۆ بەدیهێنانی حکومەتێکی هاوچەرخ و دادپەروەر، کە دووربێت لە ساختەکاری و قۆستنەوەی پۆستە حکومییەکان بۆ بەرژەوەندیی تایبەت، چونکە ئەمە تاکە رێگەیە بۆ پاراستنی متمانەی دەنگدەر و سووربوونیان لە دەنگدان و پەنابردنیان بۆ ئەنجامدانی گۆڕانکاری لەڕێگەی سندوقەکانی دەنگدان".