باری نائاسایی و قەدەغەی هاتووچۆ لەلۆس ئەنجڵس راگەیەنرا

دوای ئەوەی شەڕ و پێکدادانی توندوتیژ لە نێوان خۆپیشاندەران و پۆلیسدا روویدا وەک ناڕەزایەتییەک بەرامبەر سەرکوتکردنی کۆچبەران لەلایەن ترەمپ-ەوە، سەرۆکی شارەوانی لۆس ئەنجڵس باری نائاسایی راگەیاند.
کارێن باس،  سەرۆکی شارەوانی لۆس ئەنجڵس لە کۆنگرەیەکی رۆژنامەوانیدا رایگەیاند:" لەپێناو راگرتنی تێکدان و تاڵانکردن، قەدەغەی هاتووچۆ لە لۆس ئەنجڵس لە سەعات 8ی ئێوارەوە تا سەعات 6ی بەیانی و بۆ ماوەی سێ رۆژ بەردەوام دەبێت و لەناوەندی شار پێنج شەقامی سەرەکی دەگرێتەوە".
هەر لە کۆنگرەکەدا کان داوای لە ئیدارەی ترەمپ کرد کۆتایی بەو هەڵمەتانە بهێنێت کە گرتوویەتییەبەر و جەختی لەوە کردەوە، بارودۆخەکە پێویستی بەو هەڵمەتانە و جێگیرکردنی هێزی دەریایی نییە.
لەلایەکی دیکەوە وەزارەتی بەرگری ئەمریکا رایگەیاند:" ترەمپ فەرمانی داوە دوو هەزار ئەندامی پاسەوانی نیشتمانی دیکە بۆ رووبەڕوبوونەوەی ناڕەزایەتییە بەردەوامەکانی لۆس ئەنجڵس جێگیربکرێن، لەکاتێکدا ئۆپەراسیۆنە بەردەوامەکەی لۆس ئەنجلۆس کە ناوی لێنراوە هێزی ئەرکی 51، نزیکەی 2هەزار و 100 ئەندامی پاسەوانی نیشتمانی و 700 هێزی دەریایی چالاک لەخۆدەگرێت"، هاوکات ویلایەتی کالیفۆرنیا سکاڵای یاسایی لەسەر ترەمپ تۆمارکرد بەهۆی بڵاوەپێکردنی هێزەکانی پاسەوانی نیشتمانی بۆ شارەکە و پارێزگاری ویلایەتەکە رایگەیاند:" دۆناڵد ترەمپ سەرۆکی ئەمریکای دژایەتی توندوتیژی ناکات تا ئەو کاتەی ئەو توندوتیژییە خزمەتی ئەو بکات ".