دەستەی حەجی عیراق: تەواوی حاجیان گەڕێندرانەوە

تەواوی حاجیانی عیراق لەرێگای وشکانییەوە گەڕێندرانەوە و دەستەی حەج و عەمرەش رایدگەیەنێت:" بە پلانێکی بەپەلە و خێرا گەڕێندراونەتەوە".
بەپێی راگەیەندراوێکی دەستەی حەج و عەمرەی عیراق:" حاجیانی عیراق لە رێگای دەروازەی سنووری عەرعەرەوە گەڕێندراونەتەوە شارەکانی خۆیان، بەبێ ئەوەی هیچ حاڵەتێکی نەخوازراو رووبدات".
ئاماژە بەوەشدەکات:" دەستەکە پلانێکی وردی بەپەلەی بۆ گەڕاندنەوەی حاجیان گرتۆتە بەر، بۆ ئەوەی لە کەمترین ماوەدا تەواوی حاجیان لە رێگای وشکانی بگێڕێتەوە، کە بەهۆی پەرەسەندنە ئەمنییەکان ئاسمانی عیراق داخراوە".
لە کۆتایشدا رایدەگەیەنێت:" دوێنێ ئێوارە، ئەو کەسانەی توانایان نیە بە رێگای وشکانی بگەڕێنەوە، لە رێگای فڕۆکەخانەی بەسرەوە گەڕاونەتەوە، کە زیاتر حاجیانی بە تەمەن بوون، بەمەش تەواوی حاجیان گەڕێندرانەوە".