رێکارەکانی ناردنی مووچە تەواو بوون بڕیارە ئەمڕۆ پارەکە بگاتە هەرێمى کوردستان

وەزارەتی دارایی ئابووریی هەرێمی کوردستان ڕایگەیاند: 974 ملیار و 813 ملیۆن دینار وەکو شایستەی دارایی مووچەخۆران خرایە سەر هەژماری بانکی وەزارەتی دارایی و ئابووری.
دەوترێ دوێنێ بەهۆی کێشەیەکی تەکنیکییەوە پارە بۆ مووچەی مانگی پێنج نەنێردراوە. هەرچەندە هەموو رێکارەکان تەواو کراوبوون.
سەرچاوەیەک لە وەزارەتی داراییی هەرێمی کوردستان دەڵێت: "لە دوێنێ شەوەوە شاندێکی تەکنیکیی وەزارەتی داراییی هەرێمی کوردستان چووبوونە بەغدا بۆ گفتوگۆکردن لەبارەی رێکارەکانی ناردنی مووچە، خەرجی، داهات و مووچەی مانگی 6 و مانگەکانی دواتری".
بەپێى زانیارییەکان لەبەشی ژمێریاری وەزارەتی دارایی عێراق رێکارەکانی ناردنی مووچەی هەرێمی کوردستان تەواوکران.
سەرچاوەیەک لە وەزارەتی دارایی هەرێمی کوردستان دەڵیت، " دوای گەیشتنی پارەکە، لیستی مووچە رادەگەیێندرێت و هەوڵدەدەین رۆژانی هەینی، شەممە و یەکشەممە لە ماوەی سێ رۆژدا مووچەی فەرمانبەرانی هەرێمی کوردستان دابەش بکەین".
هەر دوێنێ فوئاد حوسێن، جێگری سەرۆکوەزیران و وەزیری دەرەوەی عێراق، راگەیاند: "کاتێک مووچەی مانگی پێنج خەرج کرا، واتە مووچەی مانگەکانی داهاتووش (6 و 7) خەرج دەکرێت".