كۆنفرانسی میونشن و بەنێودەوڵەتیبوونی پرسی كورد

كۆنفرانسی ئاسایشی میونشن، یەكێكە لە فراوانترین كۆبوونەوەكان لەسەر ئاستی جیهان، ساڵانە لە وڵاتی ئەڵمانیا لەسەر پرسە نێودەوڵەتیەكان (سیاسەتی ئاسایش، تیرۆر، ئاسایشی ئەلكترۆنی، جەنگ و..هتد) ئەنجامدەرێت و تیایدا لە ئەنجامی ئاڵۆگۆڕی بیروڕا لەنێوان بەشداربووانی كۆنفرانسەكەدا، سەرەڕای هەڵسەنگاندنی دۆخی رابردوو ئێستا، كۆمەڵێ بیرۆكە و پێشنیاری نوێ و گونجاو و كاریگەر دێنێتە كایەوە بۆ داهاتوو لەسەر چۆنیەتی رووبەڕووبونەوەی هەڕەشە و قەیرانە جۆراوجۆرەكان.
گرنگی ئەم كۆنفرانسە بۆ گەلی كوردستان، لەوەدایە كە جاران كورد و بزووتنەوە سیاسیەكەی لە دوورەوە تەنها هەر تەماشاكەرێك بوو، بەڵام لەئێستادا و بەپێچەوانەی جارانەوە كورد بەشدارییەكی كارا لە كۆنفرانسەكەدا دەكات، ئەمەش ئەو راستییە دەسەلمێنێت كە پرسی كورد بۆتە پرسێكی سەرەكی نێودەوڵەتی و یەكێكە لە كارەكتەرە سەرەكیەكان، كە بۆ تاوتوێكردن و چارەسەركردنی پرسە نێودەوڵەتییەكان پرسیان پێ دەكرێت و لەرووی دیپلۆماسیەوە كورد پێگەی بەهێزتر بووە. 
بە فەرمی بەشداریكردنی دوو كارەكتەری سەرەكی لە هەرێمی كوردستان سەرۆك بافڵ جەلال تاڵەبانی سەرۆكی یەكێتی نیشتمانی كوردستان و نێچیرڤان بارزانی سەرۆكی هەرێمی كوردستان و لەسەر ئاستی عێراقی فیدراڵیش محەمەد شیاع سودانی سەرۆك وەزیرانی عێراق بەشداریكردوە، ئەوەی زیاتر بۆتە جێگەی سەرنجی میدیا ناوخۆیی و جیهانیەكان بەشداریكردنی هەڤاڵ بافڵ تاڵەبانی بوو، كە تاكە سەرۆكی حزبێكی كوردستانی و عێراقییە بۆ ئەو كۆنفرانسە بانگهێشتكرابێ، هەڵبەت لە دیدارەكانی خۆیدا سەرۆك بافڵ تاڵەبانی گرنگی بە دوو خاڵی سەرەكیدا. 
خاڵی یەكەم: دۆخی باشوری كوردستان و پتەوكردنی پەیوەندییەكانی هەرێم لەگەڵ ئەو لایەنانە و چارەسەركردنی كێشە هەڵپەسێردراوەكانی نێوان هەرێم و بەغدا لەڕێی دانوستانەوە. 
خاڵی دووەم: هەرچەندە لە رۆژئاوای كوردستان هیچ كوردێك بۆ كۆنفرانسەكە بانگهێشت نەكرابوو، بەڵام سەرۆكی یەكێتی توانی ئەو بۆشاییە پڕ بكاتەوە و وەكو سەركردەیەكی نیشتمانیی و هەڵگری پەیامی ئاشتی گەلی كوردستان، نوێنەرایەتی رۆژئاوای كوردستانیشی كردووە، هەڵبەت لە هەموو دیدارەكاندا داوای دەكرد پرسی رۆژئاوای كوردستان لەڕێی دانوستانەوە چارەسەر بكرێت و مافی هەموو پێكهاتەكانی سوریا بەتایبەتی مافی گەلی كورد لەو وڵاتەدا پارێزراو بێت و هیچ بڕیارێك لەسەر ئایندەی ئەو وڵاتە بەبێ بەشداری كورد نەدرێت، ئەو پەیام و هەڵوێستەی سەرۆك بافڵ لەسەر سوریا و رۆژئاوای كوردستان هاوتەریبە لەگەڵ هەڵوێستی بەشێكی زۆر لە وڵاتە زلهێزەكانی جیهان و دووپاتكردنەوەی دیدگا و بۆچوونی سەركردە باڵاكانی رۆژئاوای كوردستانە، كە دەیانەوێ‌ لە سوریای نوێدا دوور لە شەڕ و توندوتیژی و خۆسەپێنی هەموو پێكهاتەكانی ئەو وڵاتە شەریكێكی راستەقینەی حكومڕانی وڵاتەكەیان بن و مافەكانیان پارێزراو بێت، ئەمەش یەكێكە لە دەستكەوت و گرنگییەكانی بەشداری سەرۆكی یەكێتیی نیشتمانیی كوردستان لە كۆنفرانسی میونشن دا.