پێشنیارێک: با ناودارانی کەرکوک لەبیر نەکەین

کاتێک یەکەم جار لە ساڵی ١٩٧٥  لە گەڵ  رەحمەتی باوکم سەردانی هەولێرم کرد، بە بەراورد بە ئێستا شارێکی بچووک بوو. باوکم لەوێ کاری دەکرد بە هۆی کوردبوونیی و ڕەگەزپەرستی رژێمی ئەوسای عیراق لە کۆمپانیای نەوتی باکوور گواسترابووەوە هەولێر . نەمتوانی زیاتر لە ڕۆژێک لەوێ بمێنمەوە. بەڵام ئەمڕۆ هەولێر بووەتە شارێکی گەورە، پڕ لە شوێنی گەشتیاری کە گەورە و بچووک ڕادەکێشێت، شاری قەڵا و مینارەیە ، وەک خەڵکەکەی وەسفی دەکەن.
پارێزگا نزیکەکانمان پەیکەریان بۆ شاعیر و گۆرانیبێژەکانیان داناوە، تەنانەت ئەوانەش کە هێشتا لە ژیاندان، لە شوێنە جوانەکان وەک ڕێزلێنان لە ڕۆڵیان. بۆ نموونە، شاری سلێمانی سەرەڕای پڕۆژە ئاوەدانی و گەشتیارییە گەورەکانی، نموونەیەکە لە گرنگیدان بە ڕۆشنبیران و شاعیرەکانی، کە پەیکەری کەسایەتی وەک شێرکۆ بێکەس، عەبدوڵڵا گۆران، و پیرەمێرد و مەولەوی لە باخچە گشتی و گۆڕەپانەکاندا دەبینین. سلێمانی تەنها لەسەر یادکردنەوەی ناوەکان نەوەستاوە، بەڵکو شوێنە کۆنەکانیشی تۆمار کردووە، شوێنە مێژووییەکانی وەک سەرای و مۆزەخانەی سلێمانی پاراستووە، کە شارەکەی کردووەتە تێکەڵاوێک لە کەلەپوور و مۆدێرنیتە.
ئەوەی ئێستا  هەولێر لە کەرکوک  جیا دەکاتەوە ، گرنگیدانیەتی بە مێژوو و کەلەپوورەکەی، چونکە هێما کەلتووری و هونەریەکانی پاراستووە  و ڕێزی لە کەسایەتییەکانی گرتووە  لە ڕێگەی پەیکەر، مۆزەخانە، و بەرنامەی ڕادیۆ و تەلەفزیۆنی کە ژیاننامەیان تۆمار دەکات. ئەم گرنگیدانە نیشانەی ڕێزگرتنی شارەکەیە لەو کەسایەتیانەی کە بەشدارییان لە گەشەپێدانیدا کردووە، ئەمەش شتێکە لە کەرکوک کەموکورتیمان تێیدا هەیە.
هەمیشە هەستم کردووە کە ستەمێکی گەورە بەرامبەر بە کەسایەتییەکانی کەرکوک لە نووسەران، هونەرمەندان، و کەسایەتییە کۆمەڵایەتییەکان تێیدا ، ئەوانەی نەوە دوای نەوە  بەشدارییان لە دروستکردنی ڕوخساری کەلتووری شارەکە کردووە. ئایا ئەم گەورانە مافی ئەوەیان نییە لە شارەکەیاندا ڕێزیان لێ بگیرێت؟ بۆچی پەیکەری کەسانی وەک جەلیل قەیسی، عەلی مەردان، عەبدولواحید کۆزەچی، هابە، هجری دەدە و زاهیر شوکر، جان دەمۆ، فازڵ عەزاوی، و حەسەن جاف و دەیانی تر کە شوێنپەنجەیان لە مێژووی کەرکوکدا بەجێهێشتووە، نابینین؟
پێشنیارەکان بۆ پاراستنی میراتی کەرکوک
پێویستە لایەنە پەیوەندیدارەکانی کەرکوک، چ ئەنجومەنی پارێزگا یان دامەزراوە کەلتوورییەکان، دەست پێشخەری بکەن بۆ هەنگاوی کردەیی بۆ ڕێزگرتن لە کەسایەتییەکانی شارەکە. ئەمەش دەکرێت لە ڕێگەی.:
١-دانانی پەیکەر لە باخچە گشتی و گۆڕەپانە سەرەکییەکان بۆ کەسایەتییە ئەدەبی و هونەرییە دیارەکان.
٢-تەرخانکردنی هۆڵێک لە قشڵەی کەرکوک بۆ پیشاندانی وێنە و پەیکەری کەسایەتییە مێژووییەکان، کە ببێتە جێگەی سەردانی شاند و میوانان.
٣-دانانی ژیاننامەی کەسایەتییەکانی کەرکوک لە پڕۆگرامی خوێندن تاکو خوێندکاران بەشێکی گرنگی مێژووی شارەکەیان بناسن.
٤-دەستپێکردنی بەرنامەی تەلەفزیۆنی و ڕادیۆیی کە تیشک دەخاتە سەر دەستکەوتەکانی ئەم کەسایەتیانە و ڕۆڵیان لە بوارە جیاوازەکاندا.
٥-پاراستنی شوێنە کەلەپوورییە کۆنەکان کە یادەوەری شارەکە پێک دەهێنن، وەک بازاڕ و قاوەخانە و بینا مێژووییەکان، و گۆڕینی هەندێکیان بۆ ناوەندی کەلتووری.
ڕێزگرتن لە هێماکانی کەرکوک تەنها یادکردنەوەی ڕابردوو نییە، بەڵکو وەبەرهێنانە لە داهاتوودا، چونکە هەستی سەر بە شارەکە بەهێز دەکات و ناسنامەی شارەکە لە لەناوچوون دەپارێزێت. بۆیە، هیوامان وایە لایەنە بەرپرسەکان جووڵە بکەن بۆ دادپەروەری لەگەڵ مێژووی کەرکوک و کەسایەتییەکانی، یان پشتگوێخستن بەردەوام دەبێت لە سڕینەوەی لاپەڕەکانی ئەم میراتە دەوڵەمەندە. ئەوەی  ئێستا بووتە مایەی گەشبینیمان ئەوەیە کە ئیدارەی نوێ ی پارێزگا  لە بەرژەوەندی خەڵکی پارێزگاکە بە هەموو ئاراستەکاندا کار دەکات  و باوەڕیشم وایە کە ئاوڕێکی راستەقینە لەم بوارش دەدات .