لیژنەی هەمواركردنەوەی دەستوری سەرۆكایەتی كۆمار كۆتایی بەكارەكانی هێناوە

لیژنەی هەمواركردنەوەی دەستور لە سەرۆكایەتی كۆماری عیراق كۆتایی بەكارەكانی هێناوە و تێپەڕاندنی ئەو هەموارەش پێویستی بە رێككەوتنی لایەنە سیاسییەكان هەیە.

لەو بارەیەوە، موحسین سەعدون ئەندامی لیژنەكە، رونیكردەوە لیژنەكەیان بەسەرۆكایەتی عەلی شوكری و ئەندامێتی 25 پسپۆڕی باڵای یاسایی، كارەكانیان كۆتایی پێهێناوە .

وتیشی: لەو ماددانەی داوای هەمواركردنەوەیان كردوە، پێشنیازیانكردوە پەرلەمان بۆ 180 ئەندام و مادەی 76ی تایبەت بە گەورەترین كوتلەش كە حكومەت پێكدەهێنێت، هەمواربكرێتەوە .

باسی لەوەشكرد، گرنگترین دانوستانەكانیان تایبەت بووە بەو مادە دەستورییەی كە تایبەتە بە دامەزراندنی ئەنجومەنی فیدراڵی كە تائێستا دانەمەزراوە و هاوشێوەی ئەنجومەنی پیرانە و دەبێتە تەواوكاری كارەكانی پەرلەمان .

ئاشكراشیكرد هەر لە چوارچێوەی هەمواركردنەوەی دەستوردا پێشنیازیانكردوە دەسەڵاتی زیاتر بە سەرۆكایەتی كۆمار بدرێت .