رۆژنامه‌نووسێك وێنه‌ى مه‌ترسيدارى وشكبوونى ده‌رياچه‌ى حه‌مرين بڵاوده‌كاته‌وه‌

خالد سلێمان ڕۆژنامەنووسی تایبه‌تمه‌ند له‌ بواری ژینگە، وێنەیه‌كی شۆكهێنه‌ری ده‌ریاچه‌ی (حەمرین)ی بڵاوکردووه‌ته‌وه‌و ئاماژه‌ی بۆئه‌وه‌شكردووه‌ کە:" دەرئەنجامەکانی وشکبوونی ئه‌م ده‌ریاچه‌یه‌ مه‌ترسیداره‌و كاریگه‌رییه‌كانی هەموو کەسێک لە ناوخۆ و دەرەوەی عێراق ده‌گرێته‌وه‌.

سلێمان له‌ ئه‌ژماری خۆی له‌ تۆڕی كۆمه‌ڵایه‌تی نووسیویەتی:"کێ عێراق لە تینوێتی ڕزگار دەکات؟ ئه‌ی دسه‌ڵاتداران، ئەی خه‌ڵكینه‌، چالاکوان و ڕۆژنامەنووسانی عێراق، ئەوەی لەم وێنەیەدا دەیبینن، ناوچه‌یه‌ك له‌ دەشتاییه‌کانی عێراق نییه‌، به‌ڵكو پاشماوه‌ و وێرانه‌ی دەریاچەیەکە، ناوی (حەمرین) بوو"

ئاماژەی بۆئەوەشکردووه‌ كه‌:"دەریاچەکە وشک بووەتەوەو بنەکەی بووە به‌ وشكایی، ئایا دەکرێت ئاو لە تورکیا و ئێراندا عه‌مبار بكرێت، لەکاتێکدا عێراقییەکان لە تینوێتیدا دەمرن؟ دەرئەنجامەکانی ئەم وشکبوونەوەیە بۆ هەموو کەسێک لە ناوخۆ و دەرەوەی عێراق ترسناک دەبێت”.

باسی له‌وه‌شكردوه‌: “سەقامگیریی و ئاسایشی کۆمەڵگاکان لەسەر بنەمای ئەم جۆره‌ حەوزە ئاوییانە دامەزراوە و له‌گه‌ڵ له‌ناوچوونیانشدا هەموو شتێک دادەڕووخێت و له‌ناوده‌چێت”.