كۆبونه‌وه‌ی هاوپه‌یمانی ئیداره‌ی ده‌وڵه‌ت به ئاماده‌بونی هه‌رسێ سه‌رۆكایه‌تییه‌كه‌ی عێراق به‌ڕێوه‌چوو، هه‌ریه‌ك له ئاسۆ مامه‌ند كارگێڕی مه‌كته‌بی سیاسی ی.ن.ك خالید شوانی ئه‌ندامی مه‌كته‌بی سیاسی وه‌ك نوێنه‌ری یه‌كێتی ئاماده‌ی كۆبونه‌وه‌كه‌بوون و گفتوگۆش له باره‌ی دۆخی كه‌ركوكه‌وه كرا.
هه‌ر له كۆبونه‌وه‌كه‌دا بڕیاردرا كێشه‌ی باره‌گاكانی شاری كه‌ركوك چاره‌سه‌ر بكرێت و گۆڕانكاری ئیداری له‌و شاره ئه‌نجامبدرێت به شێوه‌یه‌ك له‌گه‌ڵ ره‌زامه‌ندی هه‌مو پێكهاته‌كان بگونجێت و هه‌ڵبژاردنی ئه‌نجومه‌نی پارێزگاش له واده‌ی خۆیدا به‌ڕێوه‌بچێت.
كۆبوونه‌وه‌ی هاوپه‌یمانی به‌ڕێوه‌بردنی ده‌وڵه‌ت، به ئاماده‌بوونی محه‌مه‌د شیاع سودانی سه‌رۆك وه‌زیران و د.له تیف ره‌شید سه‌رۆككۆمار و محه‌مه‌د حه‌لبوسی سه‌رۆكی ئه‌نجومه‌نی نوێنه‌رانی عیراق و ئاسۆ مامه‌ند كارگێڕی مه‌كته‌بی سیاسی و خالید شوانی ئه‌ندامی مه‌كته‌بی سیاسی وه‌ك نوێنه‌رانی یه‌كێتیی نیشتمانیی كوردستان و لایه‌نه به‌شداربووه‌كانی هاوپه‌یمانیه‌ته‌كه، به‌ڕێوه‌چوو.
كۆبوونه‌وه‌كه له ئه‌نجومه‌نی وه‌زیران به‌ڕێوه‌چوو، كه ئاڵۆزییه‌كان و دۆخی كه‌ركوك، شه‌هید و برینداركردنی گه‌نجانی كه‌ركوك و ده‌ستگیركردن له رۆژی 2/9/2023 ته‌وه‌ری سه‌ره‌كی ئه‌و كۆبوونه‌وه‌یه بوو، هه‌روه‌ك ته‌وه‌رێكی دیكه‌ی جێبایه‌خی نوێنه‌رانی یه‌كێتی بابه‌تی مووچه و شایسته داراییه‌كانی هه‌رێم بوو.
هاوپه‌یمانییه‌كه بڕیاریدا لیژنه‌یه‌ك بۆ ئاشكراكردنی راستییه‌كان پێكبهێندرێت و گۆڕانكاری ئیداری له كه‌ركوك دا بكرێت و هاوسه‌نگی له‌نێوان هه‌موو پێكهاته‌كانیدا بپارێزرێت.
به گوێره‌ی راگه‌یه‌ندراوێكی كۆبوونه‌وه‌كه‌ش، هاوپه‌یمانی به‌ڕێوه‌بردنی ده‌وڵه‌ت ئیدانه‌ی ئاڵۆزییه‌كانی كه‌ركوك ده‌كات كه به‌هه‌ر پاساو و بیانوویه‌كه‌وه روویدا بێت.
هه‌ر به گوێره‌ی راگه‌یه‌ندراوه‌كه: " هاوپه‌یمانیه‌كه داوای پابه‌ندبوون به گفتوگۆیه‌كی نیشتمانی ده‌كات كه یارمه‌تیده‌ر بێت بۆ سه‌قامگیری ئارامی و ئاسایش له كه‌ركوك و ته‌ئكیدیشی له: "ئه‌نجامدانی هه‌ڵبژاردنی ناوخۆیی له واده‌ی خۆیدا كرده‌وه، به‌تایبه‌تی له كه‌ركوك".
Copyright © 2020 Kirkuk Tv All Rights Reserved Designed And Developed By AVESTA GROUP