وه‌فدێكی باڵای حكومه‌تی هه‌رێمی كوردستان بۆ پرسی بودجه و پشكی هه‌رێم له به‌غدایه و له‌گه‌ڵ هه‌ریه‌ك له سێ سه‌رۆكایه‌تیه‌كه و چه‌ند سه‌ركرده‌یه‌كی لایه‌نه سیاسییه‌كانی عیراق كۆبوه‌وه.
له‌باره‌ی سه‌ردانه‌كه‌ی وه‌فدی هه‌رێمه‌وه سه‌میر هه‌ورامی وته‌بێژی جێگری سه‌رۆكی حكومه‌تی هه‌رێم رایگه‌یاند: وه‌فده باڵاكه‌ی حكومه‌تی هه‌رێم پێكهاتووه له، مه‌سرور بارزانی سه‌رۆكوه‌زیران و قوباد تاڵه‌بانی جێگری سه‌رۆكوه‌زیرانی هه‌رێم و ئاوات جه‌ناب نوری وه‌زیری دارایی.
سه‌میر هه‌ورامی، راشیگه‌یاند: وه‌فده‌كه به‌مه‌به‌ستی چاره‌سه‌ركردنی كێشه‌كانی نێوان هه‌ولێر و به‌غدا و پرسی بودجه سه‌ردانی به‌غدایان كردووه.
وه‌فده‌كه چاوی به محه‌مه‌د شیاع سودانی كه‌وت و به‌پێی راگه‌یه‌ندراوێكی نوسینگه‌ی سه‌رۆكوه‌زیرانی عیراق، له كۆبوونه‌وه‌كه‌دا جه‌ختیان له سه‌ر گرنگی دۆزینه‌وه‌ی چاره‌سه‌رێك بۆ كێشه یاسایی و داراییه‌كانی نێوان حكومه‌تی فیدراڵی و حكومه‌تی هه‌رێم به‌پێی ده‌ستوور و یاسا كردووه‌ته‌وه.
دواتر له‌گه‌ڵ د.له‌تیف ره‌شید سه‌رۆك كۆماری عیراق، كۆبوونه‌وه ، سه‌رۆك كۆمار پشتیوانی خۆی بۆ وه‌فدی حكومه‌تی هه‌رێم دووپاتكرده‌وه وه‌ك تیمێكی هاوبه‌ش و یه‌كگرتوو و جه‌ختیشی كرده‌وه له‌سه‌ر پێویستی هه‌وڵی هه‌موو لایه‌نه‌كانی حكومی و سیاسییه‌كان بۆ په‌له‌كردنی له ناردنی مووچه‌ی فه‌رمانبه‌رانی هه‌رێمی كوردستان"
Copyright © 2020 Kirkuk Tv All Rights Reserved Designed And Developed By AVESTA GROUP