په‌یامی وه‌زیری ڕۆشنبیری و لاوان بۆ ڕۆژی ڕۆژنامه‌گه‌ری توركمانی
یادی ڕۆژی ڕۆژنامه‌گه‌ری توركمانی پیرۆز بێت
به بۆنه‌ی تێپه‌ڕینی 113 ساڵ به‌سه‌ر ده‌رچوونی یه‌كه‌م ڕۆژنامه‌ی توركمانیی له كوردستاندا، پیرۆزباییه‌كی گه‌رم له سه‌رجه‌م خوشك و برایانی توركمان و ڕۆژنامه‌نووسانی كوردستان ده‌كه‌م.
ڕۆژی ڕۆژنامه‌گه‌ری توركمانی، بۆنه‌یه‌كی گرنگی ڕۆژژمێری بۆنه تایبه‌ته‌كانی پێكهاته‌ی توركمانه له هه‌رێمی كوردستاندا و ئاماژه‌یه بۆ گرنگی و بایه‌خی ڕۆڵی نووسه‌ران و ڕووناكبیرانی توركمان له پاراستنی ناسنامه‌ی فه‌رهه‌نگی و كولتووری و ڕووناكبیری پێكهاته‌ی توركمان.
كاروانی ڕۆژنامه‌گه‌ری توركمانی به درێژایی مێژووی سه‌رهه‌ڵدان و گه‌شه‌كردنی، به‌شێكی دانه‌بڕاوه له مێژووی كاروانی ڕۆژنامه‌گه‌ری كۆمه‌ڵگه‌ی كوردستان و له‌م بۆنه‌یه‌دا هیوای سه‌ركه‌وتنی زیاتر بۆ بزاوتی ڕووناكبیری و كولتووری توركمان ده‌خوازین.
وه‌ك وه‌زاره‌تی ڕۆشنبیری و لاوانی حكومه‌تی هه‌رێمی كوردستان، بایه‌خێكی تایبه‌تمان بۆ بره‌ودان به كولتوور و فه‌رهه‌نگ و پاراستنی ڕه‌سه‌نایه‌تی ناسنامه‌ی توركمان له كوردستان هه‌یه و بۆ ئه‌و مه‌به‌سته‌ش به‌ڕێوه‌به‌رایه‌تییه‌كی گشتیی تایبه‌ت به ڕۆشنبیری و هونه‌ری توركمان كراوه‌ته‌وه، بۆ ئه‌وه‌ی هه‌رچی زیاتره خزمه‌تی بواره جیاجیاكانی كولتوور و ڕۆشنبیری توركمانی بكات.
فره‌یی و هه‌مه‌جۆری فه‌رهه‌نگ، ڕۆشنبیری و كولتووری پێكهاته‌كان له كوردستاندا بووه‌ته سیمایه‌كی دیاری گه‌شه‌كردن و پێشكه‌وتنی ڕه‌وشی پێكه‌وه‌ژیانی ئاشتییانه و سه‌قامگیری كۆمه‌ڵایه‌تییمان.
دووباره پیرۆز بێت ڕۆژی ڕۆژنامه‌گه‌ری توركمانی.
حه‌مه‌ی حه‌مه‌سه‌عید
وه‌زیری ڕۆشنبیری و لاوانی حكومه‌تی هه‌رێمی كوردستان
25ـی شوباتی 2024
Copyright © 2020 Kirkuk Tv All Rights Reserved Designed And Developed By AVESTA GROUP