دەیڤد ...سەربازە وونەکەى ژوورى ئۆپەراسیۆنى ریاڵ مەدرید
ئاکۆ بیبانى
ریاڵ مەدرید باڵادەستى تەواوى بەسەر تۆپى پێى ئەوروپادا گرتوەو هەموان
بەدوای سیحرو جادوى ئەو هێزە شاراوەیەى یانە ئیسپانیەکە و پادشاى ئەوروپا و
چامپیۆنزلیگ وێڵن .
لەم راپۆرتەدا باسى هێزى شاراوەو
پیاوە وونەکەى نێو ئۆپەراسینۆنەکانى ریاڵ مەدرید دەکەین کە رۆڵى کارا و یەکلاى
کەرەوەى هەیە .
دەیفد ئەنچیلۆتى ئەو یاریزانەى لە تەمەنى 20 ساڵیدا شکستى هێنا لە ژیانی
پیشەگەرى وەک یاریزان لە تۆپى پێ !کاتێک
لە ئەى سى میلانەوە دەستیپێکرد ، دواتر و لەتەمەنى 22 ساڵیدا ڕوویکردەى جیهانى
راهێنەرایەتى و ئێستا لەیەکێتى تۆپى پێى ئەوروپا خاوەنى بڕوانامەى ئەى نێودەوڵەتیە
.
سەرەتا لەگەڵ کارلۆ ئەنچیلۆتى
باوکدا وەک راهێنەرى تواناى جەستەیی لە یانەى پاریس سانجیرمان دەرکەوت لە ساڵى
2012 ، پاشان لە یانەى بایرن میونشین لەگەڵ ئەنچیلۆتى باوک درێژەى بەکارەکەى دا،
کاتێکیش کارلۆ بووە راهێنەرى یانەى شاهانە راستەوخۆ دەیفد وەک راهێنەرى توانای
جەستەیی دەرکەوت .
دەیفد لاوێکى ژیر و لێهاتوو و خاوەن بیرۆکەى نوێیە و لاى یاریزانانى ریاڵ
مەدرید و ئیدارەى یانەکەش رێزلێگیراو و قبوڵکراوە ، کارلۆ سەرپشکى کردوە لەوەى
لەکاتى هەر هەڵەیەکدا دەستێوەردان بکات ، تواناى ئەوەشى هەیە راھینانەکانى یانەى
شاهانە رابگرێت ، دەیفید لەم یارییانەى کۆتایی کەوتە بەر فۆکسى میدیاکان کاتێک ئەنچیلۆتى
داوای ئاڵوگۆڕى بیرو ڕای لێکرد ، راهێنەرەکەى ریاڵ مەدردیش بەئاشکرا باسى
لەوەکردوە لایەنە تەکنیکییەکانى ریاڵ مەدرید بەشێکى زۆرى پەیوەندى بە دەیفیدى
کوڕییەوە هەیە .
لەم وەرزەدا بەتەواوى کوڕەکەى ئەنچیلۆتى درەوشایەوە ، لە یارى نێوان ریاڵ
مەدرید و مانچێستەر سیتى تەواوى لێدانە سزاکان لەسەر داوا و خواستى دەیفید بووەو
هەر خۆى یاریزانەکانى هەڵبژاردوە ، ئەمە جگە لەوەى لە یارى پێش کۆتایش بەرامبەر بە
یانەى بایرن ، لەدەقیقەى 80 کاتێک کارلۆ داوای راوێژى لێکرد دەربارەى
گۆڕانکارییەکان ، پێشنیازی کرد یارى بەخۆسیلۆ بکات ئەو یاریزانەش وەچەرخانى گەورەى
خولقاند و دوو گۆڵى تۆمارکرد .
جێى دەستى کوڕەکەى ئەنچیلۆتى بەتەواوى بەسەر پێکهاتەکەى ریاڵ مەدریدەوە
دەبینرێت ، بەتایبەت لە تۆپە جێگیرەکان، لێدانى گۆشەکانیش خاڵى بەهێزى ریاڵ مەدرید بووەو
چەند گۆڵێک بەو جۆرە نەخشێنراوە ، پەرەپێدان
و گەشەکردن بە تواناى هێڵى بەرگرى یانەکە
یەکێکە لە هۆکارە سەرەکییەکانى بردنەوەکان ! سەربارى ئەوەى پێکان بەرۆکى چەند یاریزانێکى
هێڵى بەرگرى گرتبوو .
لەئێستاشدا چەند یانەیەکى ئەوروپا هاوشێوەى بازڵ و ریمس و سیفییا هەوڵى واژۆکردنى بۆندى لەگەڵ
دەدەن ، بەڵام کارلۆ ئەنچیلۆتى ووتویەتى تاکو لە ستافی راهێنەرایەتى یانەکە
بەردەوام بێت دەیفیدیش لە سانتیاگۆ دەمێنێتەوە .
Copyright © 2020 Kirkuk Tv All Rights Reserved Designed And Developed By AVESTA GROUP