كۆمسیۆن: لەم هەفتەیەدا سەرۆكایەتیی هەرێم وادەیەكی نوێ بۆ هەڵبژاردن دیاریدەكات

سەرۆكی كۆمسیۆنی باڵای سەربەخۆی هەڵبژاردنەكانی عێراق رایدەگەیەنێت، لەم هەفتەیەدا سەرۆكایەتیی هەرێمی كوردستان وادەیەكی نوێ بۆ هەڵبژاردنی پەرلەمانی كوردستان دیاریدەكات و دەشڵێت، “ئەو وادەیەی دیاریدەكرێت رەزامەندیی سەرجەم لایەنە سیاسییەكانی لەسەر دەبێت”.
دادوەر عومەر ئەحمەد سەرۆكی كۆمسیۆنی باڵای سەربەخۆیی هەڵبژاردنەكانی عێراق رایگەیاند، بەهۆی دیاری نەكردنی رۆژی هەڵبژاردن نەیانتوانیوە خشتەی كارەكانی هەڵبژاردن دیاریی بكەن و پێشتر پێشنیازی 5ی ئەیلولی ئەمساڵیان كردووە و ئەوەی لای ئەوان گرنگە بەڕێوەچوونی هەڵبژاردنە لە ئەمساڵدا.
وتیشی، ” لەگەڵ سەرۆكایەتیی هەرێم لە پەیوەندیی بەردەوامداین و دڵنیایان كردینەوە كە ئەم هەفتەیە بە مەرسوومێك وادەی هەڵبژاردنی پەرلەمانی كوردستان دیاریدەكرێت و ئەو وادەیەی دیاریدەكرێت رەزامەندیی سەرجەم لایەنە سیاسییەكانی لەسەر دەبێت”.