بەرازیل لە تیمێکى ترسناکەوە بۆ تیپێکى بێ رۆح

بەرازیل لە تیمێکى ترسناکەوە بۆ تیپێکى بێ رۆح
ئاکۆ بیبانى
بەرازیل چیتر مایەى هەڕەشەو ترس نیە بۆ هەڵبژاردەکانى جیهان ، چیتر ئەو تیپە سامناکە نیە کە لە رابردوو پێى دەناسرایەوە ، سیلیساو چیتر ناگات بە کۆتایی پاڵەوانێتیە گەورەکان ، لە جامى جیهانى تاکو قۆناغى هەشت دەڕوات و ماڵئاوایی دەکات ، لە کۆوپا ئەمریکا هەر زوو دووردەخرێتەوە .
بەرازیل لانکەى تۆپى پێ و سەرچاوەی ئەستێرە گەورەکان بوو ، بەرازیل خاوەن دەیان ئەستێرەیی مێژوویی بوو ، هیچ سەردەم و کاتێک نەبووە سامبا یاریزانى ئەفسانە و تۆقێنەرى نەبێت ، هیچ زەمەنێک ڕووى نەداوە یەکێک لە باشترینەکانى جیهان لەبەرازیلەوە دەرنەکەون ، ئێستا تیپى تۆپى پێى ئەو وڵاتە هاوشێوەى گوزەریانیان،  لە ڕووى رۆحیەت و ئەستێرەى تۆپى پێوە هەژارن ، ئیستا بەرازیل تیمێکى ئاسایی ئەمریکاى باشوورەو لە پاشەکشەى بەردەوامدایە ، ئەوەتا ئەو بەرازیلەى کە لە رابردوودا هەمیشە لەسەر سەکۆى نازناوەکان بوو چەندە داماو و مەلولە ، ئەو بەرازیلەى جیهان بەدەستییەوە گیرى خواردبوو ئێستا وێڵى تۆمارکردننى گۆڵێک و بردنەوەیەکە ، ئێستا هەڵبژاردەى بەرازیل بە دەست نەبوونى راهێنەرێکى بەئەزمونەوە دەناڵێنێت ، یاریزانەکان هیچ رۆحییەتێکیان بۆ وڵاتەکەیان نیە ، تەنانەت لە پاڵاوتنەکانى ئەمریکاى باشوور بۆ گەیشتن بە جامى جیهانى 2026 حاڵیان خراپە .
ئەم پێکهاتەیە رووبەڕووى دەیان رەخنەى توند لە ناوخۆى ووڵاتەکەو شەقامى وەرزشى بۆتەوە ، چۆن دەکرێت یەکێک لە زلهێزترین ووڵاتەکانى تۆپى پێ کە 5 ئەستێرە لەسەر درێسەکەى بێت ئەمە بارودۆخەکەى بێت و رۆژ بە رۆژ تۆپى پێ لە ووڵاتە لە پاشەکشەدابێت ، چۆن دەکرێت سەرکردەیەک نەبێت کە پێشڕەوى وڵاتەکەى بکات و بەرەو کەنارى ئارامى ببات ، لە رابردوودا بەرازیل بە بەهێزى ، بەسەرەنج راکێشى بە نمایشى ناوازە ، بە چێژ ناسرابوو ، وەلێ ئێستا بەرازیل هیچ یەک لەم سیفاتانەى تێدا نەماوەو وا هێدى هێدى دواین بزمار لە تابووتى خۆى دەدات .