قوباد تاڵەبانی، جێگری سەرۆکوەزیران پێشوازیکرد لە وەفدێکی حکومەتی ئەڵمانیا بە سەرۆکایەتی خاتوو لویس ئامستبێرگ، بەرپرسی کۆمسیۆنی فیدراڵی حکومەتی ئەڵمانیا بۆ سیاسەتەکانی مافەکانی مرۆڤ و هاوکاریی مرۆیی و لە کۆبوونەوەی نێوانیاندا گفتوگۆکرا لەبارەی دۆخی ئاوارە ناوخۆییەکان، بە تایبەتیش ئاوارە ئێزدییەکان.
لە کۆبوونەوەکەدا کە رۆژی سێ شەمە (٢٣ی تەموزی ٢٠٢٤) لە هەولێر بەڕێوەچوو، جەخت کرایەوە لە پاراستنی هەموو مافەکانی ئاوارەکان و بە تایبەتیش ئاوارە ئێزدییەکان لە هەرێمی کوردستان.
لەمبارەیەوە جێگری سەرۆکوەزیران و وەفدەکەی حکومەتی ئەڵمانیا هاوڕابوون کە هەموو لایەک بەیەکەوە کار بکەن لەپێناو پاراستنی سەقامگیری لە ناوچەی شەنگال، تا ئاوارەکان بتوانن بەبێ ترس و دڵەڕاوکێ بگەڕێنەوە بۆ زێدی خۆیان.
جێگری سەرۆکوەزیران هەموو پشتیوانییەکی خۆی دەربڕی بۆ ئاساییکردنەوەی دۆخی ئەو ناوچەیە و بە پێویستیشی زانی حکومەتی ئەڵمانیا و کۆمەڵگای نێودەوڵەتی لەمبارەیەوە زیاتر رۆڵ ببینن.
Copyright © 2020 Kirkuk Tv All Rights Reserved Designed And Developed By AVESTA GROUP