سیتیگروپ: سەرکەوتنى ترەمپ دەبێتە هۆی دابەزینی نرخی نەوت

کۆمپانیایەکى ئەمریکى پێشبینى دەکات، بە سەرکەوتنى دۆناڵد ترەمپ بۆ سەرۆکایەتى ئەمریکا، نرخى نەوتى خاو لە جیهاندا دابەزین تۆمار بکات.
سیتیگروپ، کۆمپانیاو بانکى ئەمریکى نێودەوڵەتى، لە یاداشتێکی توێژینەوەدا پێشبینى دەکات، بە سەرکەوتنى دۆناڵد ترەمپ بۆ سەرۆکایەتى ئەمریکا کە بڕیارە لە 20ـى نۆڤەمبەر هەڵبژاردنى سەرۆکایەتیى ئەمریکا ئەنجامبدرێت، کاریگەری لەسەر دابەزینی نرخی نەوت دروست دەکات، چونکە فشار دەخاتەسەر رێکخراوی وڵاتانی هەناردەکارى نەوت "ئۆپێک" و هاوپەیمانەکانی بۆ زیادکردنى هەناردەى نەوتى خاو بۆ بازاڕە جیهانییەکان.
شیکارانى سیتیگرووپ ئەوەشیان خستووەتەڕوو، لە سەردەمی سەرۆکایەتی ترەمپدا فشارەکانی سەر ئێران زیاد دەکرێن و هەناردەی نەوتى ئێران لە نێوان 500 بۆ 900 هەزار بەرمیل لە رۆژێکدا کەمدەبێتەوە، لەبەرامبەردا وڵاتانى دیکەى بەرهەمهێنەرى نەوت هەناردەى نەوتى خاو زیاد دەکەن.
ئەمە لەکاتێکدایە، نرخى نەوتى خاو لە بازاڕەکانى جیهان دابەزینى بەخۆوە بینیوەو لەماوەى پێنج رۆژى رابردوودا نرخى نەوتى برێنت لە 83 دۆلارو 11 سەنت بۆ 79 دۆلار و 40 سەنت دابەزیوە، هەروەها نرخى نەوتى تەکساس لە 79 دۆلار و 11 سەنت بۆ 76 دۆلار و 16 سەنت دابەزینى تۆمار کردووە.