قوباد تاڵەبانی جه‌خت له‌ گرنگیی وەبەرهێنانی فەڕەنسا لە هەرێم ده‌كاته‌وه‌

قوباد تاڵەبانی، جێگری سەرۆک وەزیران لە کۆبوونەوەی لەگەڵ یان برێم، کونسوڵی گشتیی فەڕەنسا لە هەرێم، گفتوگۆیان کرد لەبارەی ئامادەکارییەکان بۆ دیداری بازرگانی فەڕەنسی – کوردستانی کە بڕیارە لەمانگی ئەیلول لەپاریسی پایتەختی فەرەنسا بەڕێوەبچێت.

لە کۆبوونەوەکەدا کە رۆژی چوارشەمە (٣١ی تەموزی ٢٠٢٤) لە هەولێر بەڕێوەچوو، قوباد تاڵەبانی پشتیوانی خۆی بۆ بەڕێوەچوونی دیداری بازرگانی فەڕەنسی – کوردستانی لە پاریس راگەیاندو ئامادەیی حکومەتی هەرێمی دەربڕی بۆ هەموو جۆرە هاوکاری و کارئاسانییەک بۆ سەرکەوتنی دیدارەکە. 

لە بەرامبەردا کونسوڵی گشتیی فەڕەنسا بە ئاماژەدان بە گرنگیی چاکسازییە ئابورییەکانی جێگری سەرۆک وەزیران، داوایکرد قوباد تاڵەبانی بەشدارییەکی کارای لە بەڕێوەچوونی دیدارەکەدا هەبێت.

لە بەشێکی دیکەی کۆبوونەوەکەدا جێگری سەرۆک وەزیران بە گرنگییەوە باسی لە پێویستی وەبەرهێنانی فەڕەنسی کرد لە هەرێم و جەختی کردەوە لەسەر ئەوەی کە حکومەتی هەرێم ئامادەیە هەموو جۆرە کارئاسانییەک بۆ وەبەرهێنەرانی فەڕەنسی بکات. 

هەردوولاش هاوڕابوون کە بۆ پەرەپێدانی زیاتری وەبەرهێنانی فەڕەنسی لە کوردستان، پێویستە حکومەتی هەرێم هاوکاری و کارئاسانی زیاتر پێشکەشی وەبەرهێنەرانی ئەو وڵاتە بکات