بۆ پەرەپێدانی ٤ کێڵگەی نەوتی لە کەرکوک، عیراق یاداشتنامە لەگەڵ کۆمپانیای (بی پی) بەریتانی واژۆدەکات

سەرۆک وەزیرانى عیراق سەرپەرشتی مەراسیمی واژۆکردنی یاداشتنامەی لێکتێگەیشتن لەگەڵ کۆمپانیای بی پی بەریتانی دەکات بۆ نۆژەنکردنەوە و پەرەپێدانی ٤ کێڵگەی نەوتیی کەرکوک

نوسینگەى سەرۆک وەزیران بڵاویکردوەتەوە: محەمەد شیاع سودانى سەرۆک وەزیرانی عیراق سەرپەرشتى مەراسیمی واژۆکردنی یاداشتێکی لێکتێگەیشتنی تۆکمەی نەوتی نێوان وەزارەتی نەوت و کۆمپانیای نەوتی بریتیش پەترۆلیۆم (BP)ی کرد بۆ پەرەپێدانی کێڵگەکانی کەرکوک لە بەرهەمهێنانی نەوت و گاز.

واژۆکردنەکە لە لایەنی عێراقی لەلایەن حەیان عەبدولغەنی جێگری سەرۆکوەزیران بۆ کاروباری وزە و وەزیری نەوت واژۆی لەسەر کرا و هەروەها مۆرای ئۆچینکلۆس بەڕێوەبەری جێبەجێکاری کۆمپانیاى بریتیش پەترۆلیۆم وەک لایەنى بەرامبەر واژۆی کرد.

 یاداشتەکە بریتییە لە نۆژەنکردنەوە و پەرەپێدانی چوار کێڵگەی کۆمپانیای نەوتی باکور لە کەرکوک، ئەوانیش کێڵگەی (بابا و هاڤانا) و کێڵگەی بای حەسەن و کێڵگەی جەمبور و کێڵگەی خەباز، هەروەها ئەگەری ڕێککەوتن لەسەر گەڕان و پەرەدان بەکێڵگەى نەوتى تر بە ڕێککەوتنی هەردوو لایەن لەئارادایە، لە ژێر ڕۆشنایی هەوڵەکانی حکومەت بۆ وەبەرهێنان لە بواری وزە، بە ئامانجی زیادکردن و بەرزکردنەوەی بەرهەمهێنانی نەوت، وەبەرهێنانی غاز و وزەی خۆر لەکەرکوک.