لیژنەی دارایی پەرلەمان بەدواداچوون بۆ دواکەوتنی مووچەی مووچەخۆرانی هەرێمی کوردستان دەکات

وەزیری دارایی عێراق بانگهێشتی لیژنەی دارایی ئەنجوومەنی نوێنەرانی عێراق دەکرێت و پرسیاری لەبارەی مووچەی فەرمانبەرانی هەرێمی کوردستان ئاراستە دەکرێت.
جەمال کۆچەر، ئەندامی لیژنەی دارایی ئەنجوومەنی نوێنەرانی عێراق رایگەیاند، بانگهێشتی وەزیری دارایی و چەند وەزیرێکی دیکەیان کردووە و بڕیارە رۆژی سێشەممە لە کۆبوونەوەی لیژنەی دارایی ئامادەبن.
وتیشی، ئەندامە کوردەکانی لیژنەی دارایی پرسیار ئاراستەی تەیف سامی دەکەن لەبارەی دواکەوتنی مووچەی مووچەخۆرانی هەرێمی کوردستان.
وەزارەتی دارایی عێراق رایگەیاندوە کە هیچ کێشەیەکی سیولەی پارەدانیان نییە و مانگانە حەوت ترلیۆن و 500 ملیار دینار بۆ مووچەی فەرمانبەران و چین و تویژە جیاوازەکان دابین دەکەن.
ئەمەش لەکاتێکدایە، سەرجەم مووچەخۆرانی عێراق مووچەی مانگی تەمموزیان وەرگرتووە، بەڵام تائەمرۆ کە ١٢ی مانگی ئابە، هیچ بڕە پارەیەک بۆ مووچەی مانگی رابردووی مووچەخۆرانی هەرێمی کوردستان نەنێردراوە.