ئەمساڵ 3 تۆن مادەی هۆشبەر لە نێو عیراقدا دەستیبەسەردا گیراوە

تەنیا ئەم ساڵ سێ تۆن ماددەی هۆشبەر دەستی بەسەردا گیراوە کە بەشی زۆری لە وڵاتانی دراوسێوە هێنراونەتە عێراقەوە.

حوسێن تەمیمی، وتەبێژی بەڕێوەبەرایەتیی گشتیی بەرەنگاربوونەوەی ماددە هۆشبەرەکان و کارتێکەرە ئەقڵییەکانی عێراق رایگەیاند:"لە سەرەتای ئەم ساڵەوە نزیکەی 10 هەزار بەکارهێنەرو بازرگانی ماددەی هۆشبەر لە سەرتاسەری عێراق بە هەرێمی کوردستانیشەوە دەستگیرکراون کە بەشێکیان بازرگانی نێودەوڵەتین"
 
ئاشکراشیکرد:"ئەم ساڵ نزیکەی سێ تۆن ماددەی هۆشبەر دەستی بەسەرداگیراوە، کە دیارترینیان کریستاڵ و حەشیش و حەبی کاپتاگۆن بوون و زۆربەیان لە وڵاتانی دەوروبەرەوە هێنراونەتە عێراق."

سەبارەت بە هاوئاهەنگیکردنیان لەگەڵ دەزگا ئەمنییەکانی هەرێمی کوردستان، وتەبێژی بەڕێوەبەرایەتیی گشتیی بەرەنگاربوونەوەی ماددە هۆشبەرەکانی عێراق دەڵێت:" هاوئاهەنگیی تەواومان لەگەڵ بەڕێوەبەرایەتیی گشتیی نەهێشتنی ماددە هۆشبەرەکانی هەرێمی کوردستان و دەزگا هەواڵگرییەکانی وڵاتانی دراوسێ و ناوچەکەش هەیە. پێکەوە کار بۆ بنبڕکردن و رێگریکردن لە بڵاوبوونەوەی زیاتری ئەو مادانە دەکەین."

بەپێی ئامارەکانی وەزارەتی ناوخۆی عێراق، لە ساڵی 2023ـشدا زیاتر لە 19 هەزار تۆمەتباری مادەی هۆشبەر دەستگیرکراون.