وەزراەتی کشتوکاڵی عیراق 12 هەزار ئامێری ئاوپرژێن بە جوتیاران دەدات

وەزارەتی کشتوکاڵی عێراق 12 هەزار ئامێری ئاوپرژێن دەکڕێت و 40%ی پارەکەی لە جووتیاران وەرناگیرێت بەڵام جووتیارانی هەرێمی کوردستان لەو ئامێرانە سوودمەند نابن.

لەوبارەیەوە محەممەد خوزاعی، وتەبێژی وەزارەتی کشتوکاڵی عیراق رایگەیاند، عێراق لەگەڵ نەمسا گرێبەستی بۆ کڕینی 12 هەزار ئامێری ئاوپرژێن بە بڕی 300 ملیۆن دۆلار ئیمزا کردووە و 40%ی پارەکەی لە جووتیاران دەبەخشرێت.

راشیگەیاند هەرێمی کوردستان وەزارەتی کشتوکاڵی خۆی هەیە و ئەو ئامێرانە لەسەر بودجەی حکومەتی ناوەندی دەکڕدرێن، بۆیە ئەگەر پێویست بێت، دەکرێت جووتیارانی هەرێمی کوردستان داوا لە وەزارەتی کشتوکاڵی خۆیان بکەن هەمان دەستپێشخەری و رێککەوتن بکات؛ هەروەها زەوییەکانی هەرێمی کوردستان هاوشێوەی زەوییە کشتوکاڵییەکانی نێوەڕاست و باشووری عێراق وشک و بیابان نین و جوتیارانیش پشت بە ئاوی بیر نابەستن، وەک زەوی پارێزگاکانی دیکەی عێراق، بۆیە جوتیارانی کوردستان لەو ئامێرانە سوودمەند نابن.