قوباد تاڵەبانی: نەیارەکانمان هیچ کات وەک ئێستا لە یەکێتی نەترساون

قوباد تاڵەبانی لێپرسراوی مەکتەبی سکرتارییەتی سەرۆک مام جەلال  لەگەڵ تیمی رێکخراوە دیموکراتییەکانی کەمپینی بانگەشەی هەڵبژاردنی یەکێتیی نیشتمانیی کوردستان کۆبووەوە

قوباد تاڵەبانی رایگەیاند كە هیچ هێزێکی سیاسی هێندەی یەکێتی شەهید و قوربانی بۆ کوردستان نەداوە و ئێمەی یەکێتی بۆ هەمیشە شانازی بەو مێژووە پڕ لە سەرەوەرییەوە دەکەین و لە سێ ساڵی رابردوودا یەکێتی بە سەرۆکایەتی سەرۆک بافڵ جگە لەوەی لە رووی حیزبییەوە خۆی رێکخستووەتەوە لە داواکاری و پێویستییەکانی چینە جۆراوجۆرەکانی کۆمەڵگاشی کۆڵیوەتەوە و بەرنامەی هەیە بۆ جێبەجێکردنی داواکارییەکانیان

هەروەها لێپرسراوی مەکتەبی سکرتارییەتی سەرۆک مام جەلال ئەوەشی راگەیاند كە پێشتر گەنجانی کوردستان متمانەیان بە یەکێتی لاواز ببوو لە هەڵبژاردنەکانی رابردوودا رێژەیەکی گەورەی گەنجان نە ئامادەبوون بەشداری لە هەڵبژاردندا بکەن و نە دەنگ بە یەکێتیش بدەن بەڵام یەکێک لە گەورەترین شانازییەکانی سەرۆک بافڵ و ئەم یەکێتییەی ئێستا ئەوەیە تا رادەیەکی باش گەنجانی لەگەڵ یەکێتی ئاشت کردوەتەوە و نەیارەکانمان هیچ کات وەک ئێستا لە یەکێتی و هێزی یەکێتی نەترساون  بە تایبەتیش کە یەکێتی ئەمجارەیان دەرگای لەسەر هەموو جۆرە ساختەکارییەک داخستووە، سەرکەوتنێکی گەورە چاوەڕێی یەکێتی و دەنگدەرانی یەکێتی دەکات و هەموو لایەکیش دڵنیا دەکەینەوە کە ئەم سەرکەوتنە گەورەیە بە باشترین شێوە بەکاردەهێنین بۆ راستکردنەوەی رێڕەوی حکومڕانی