مەکتەبی سیاسیی یەکێتی پیرۆزبایی لە زانکۆی سلێمانی دەکات

پیرۆزباییەکی  گەرم لە  سەرۆکایەتی زانکۆی سلێمانی و مامۆستایان و خوێندکارانی خۆشەویست  دەکەین، بە بۆنەی  بە دەستهێنانی پلەی یەکەم لەسەر ئاستی زانکۆکانی عێراق ، ئەم دەستکەوتە زانستییە شانازییەکی  گەورەیە بۆ  کوردستان بەگشتی و شارە حەیاتەکەی سلێمانی، بەتایبەتی .

زانکۆی سلێمانی ،وەک دایکی زانکۆکانی کوردستان  کە ساڵی ١٩٦٨ لەسەر پێشنیاز و کۆششی سەرۆک مام جەلال دامەزراوە لە مێژوی خزمەتی زانستی و فەرهەنگی و کۆمەڵایەتی خۆیدا،هەمیشە پێشڕەو و یەکەمینە و  خەرمانی داهێنان و زانستی پڕ بەرهەم و داهێنان بووە. 
لەم رێرەوە گەشەکردووەدا سەرەرای بەربەستە سیاسیی و شۆڤێنییەکانی  بەردەمی لە رۆژگاری  رژێمی بەعسدا ، ساڵی ١٩٩٢ ، دوای راپەڕینی کوردستان ، گەڕایەوە کۆڕی خزمەت بە رۆڵەکانی گەلەکەمان لە کچان و کوڕانی کۆمەڵی کوردەواری و بووە وێستگەیەکی درەوشاوەی زانست و زانیاری کە وا زیاتر لە سێ دەیەیە چەندین نەوەی خوێندەوار و پێگەیشتووی پێشکەشی رەوتی گەشەکردنی وڵاتەکەمان کردووە و بۆتە بڕاندێکی جێی شانازی بۆ شاری سلێمانی لە کوردستان و عێراق و دەرەوەشدا .

لەم سۆنگەیەوە و بەرەچاوکردنی پێگەی روناکبیری و زانستی و رۆڵ و ناوبانگی زانکۆی دایک لە بزووتنەوەی خوێندکاری و کۆمەڵایەتی و سیاسیی گەلەکەشماندا ، یەکێتیی نیشتمانیی کوردستان  چ لەرێی حکومەت و چ وەک حزبیش هەمیشە پاڵپشتی  زانکۆی سلێمانی بووەو دەبێت . بەتایبەتی سەرۆک بافل جەلال تاڵەبانی کە لەم رێگا دروستەدا ،سەرەڕای جیاکاری و گەمارۆی سەر سلێمانی، درێغی نەکردووە و ناکات لەوەی ئاوەدانی و بوژانەوە،  لەم زانکۆ ئازیزەدا لەسەر هیچ بەربەست و بیانووەیەک، پەک نەخرێت.
جارێکی تر پیرۆزە لە سلێمانی  گەشاوەو زانکۆ هەمیشە گەشاوەکەی.  

مەکتەبی سیاسیی
یەکێتیی نیشتمانیی کوردستان
٩-١٠-٢٠٢٤