رفعەت عەبدوڵا : یەكێتی ماڵی هەموو خەڵكە و دەرگای هەمیشە كراوەیە

ئێوارەی ئەمڕۆ 2024/10/09 لەهۆڵی شەهید ئاشتی لەمەكتەبی رێكخستن، رەفعەت عەبدوڵا و سەركەوت زەكی ئەندامانی مەكتەبی سیاسی و مامۆستا خالید پێشوازیان لەژمارەیەك لێپرسراوو تەواوی هەڤاڵانی مەکۆی گۆران لەپیرەمەگرون كرد كەبڕیاریانداوە لەناو ریزەكانی یەكێتیی نیشتمانیی كوردستاندا درێژە بەخەبات بدەن، هەڤاڵ رفعەت عەبدوڵا لەوتەیەكدا بەناوی مەكتەبی سیاسی یەكێتییەوە بەخێرهاتنی كردن و رایگەیاند یەكێتی ماڵی هەموو كەس و تێكۆشەر و كورد پەروەرێكە و هەمیشە دەرگای واڵایە و ماڵە گەورەكەی هەموانە ، دواتر داوایلێكردن كە هەموو توانایان بخەنەكار بۆ سەرخستنی لیستی ١٢٩ی یەكێتیی نیشتمانیی كوردستان و پەیامی یەكێتی بگەیەننە هەموو كەسوكار و دۆست و هەڤاڵەكانیان، تاوەكو دەنگ بەلیستی یەكێتی بدەن، راشیگەیاند ئەم حكومڕانیەی ئێستا لەكوردستان هەیە حكومڕانیەكی قۆرخكار و نادادپەروەر و خۆسەپێنە و پێویستە رێڕەوی حكومڕانی ڕاستبكەینەوە.
لەبەرامبەردا هەڤاڵ مستەفا سەلاحەین فەتاح لێپرسراوی مەکۆی گۆران بەناوی هەمووهەڤاڵانی مەکۆی پیرەمەگرونەوە بەڵێنیان دا پشتیوانی تەواوی لیستی ١٢٩ی یەكێتیی نیشتمانیی كوردستان بكەن و دڵسۆزانە شان بەشانی هەڤاڵەكانیان كاربكەن بۆ سەرخستنی لیستی ١٢٩.