تەواوی هەڵسوڕاو و
کادرانی بازنەی ناحیەی سەنگاوی بزووتنەوەی گۆڕان گەرانەوە ناو ریزەکانی یەکێتیی نیشتمانیی
کوردستانەوەو لێپرسراوی ئەنجومەنی پاراستنی بەرژەوەندییە باڵاكانی یهكێتی نیشتمانی
كوردستانیش پێیڕاگەیاندن: "حزب بەچاوی رێزو پێزانینەوە لە خەبات و ماندووبوونتان
دەڕوانێت".
ئەمڕۆ 15_10_2024، شێخ جەعفەر شێخ مستەفا لێپرسراوی ئەنجومەنی
پاراستنی بەرژەوەندییە باڵاكانی یهكێتی نیشتمانی كوردستان لەبارەگای ئەنجومەن پێشوازیکرد
لە هەڵسوڕاو و کادرانی بازنەی ناحیەی سەنگاو-ی بزووتنەوەی گۆڕان و وێرای بەخێرهێنانی گەرم پێیڕاگەیاندن:" ئێوەو
خانەوادەکانتان کۆمەڵێک تێکۆشەرن و فیداکاریی و قوربانیی زۆرتان داوەو خۆتان خاوەنی
یەکێتی و بەشێکی زۆر لە دەستکەوتەکانی میللەتەکەمانن و، حزب بەچاوی رێزو پێزانینەوە
لە خەبات و ماندووبوونتان دەڕوانێت".
شێخ جەعفەر داوایکرد:" هەمووان تێبکۆشین بۆ سەرخستنی بەرنامە و تێڕوانینەکانی،
لەپێش هەمووشیانەوە راستکردنەوەی شێوازی حوکمڕانی هەڵەو پڕ لە کەموکورتی هەرێم و
دابینکردنی ئازادییەکان بۆ خەڵکی کوردستان، ئەوەش بەوەدەبێت لەرۆژی هەڵبژاردندا، خۆمان
و کەسوکارو دەوروبەرمان رووو لەناوەندەکانی دەنگدان بکەین و دەنگ بدەین بە لیستی
129ی یەکێتی".
لەبەرانبەردا، هەڵسوڕاوانی
پێشووی بزووتنەوەی گۆڕان، پشتیوانی تەواوی خۆیان بۆ بەرنامەو ئەجیندای نیشتمانی و
نەتەوەییانەی یەکێتی دووپاتکردەوە و رایانگەیاند، پێشتر لەبەر کۆمەڵێک هۆکار ریزەکانی
یەکێتیمان جێهێشتووە کە ئێستا ئەو هۆکارانە نەماون و یەکێتی بووەتەوە بە تاکە ئومێدمان،
هەر بۆیە شانازی بەیەکێتی نیشتمانیی کوردستانەوە دەکەین و هەموو توانایەکمان بۆ سەرخستنی
بەرنامەکەی و لیستی 129 دەخەینەگەڕ.
Copyright © 2020 Kirkuk Tv All Rights Reserved Designed And Developed By AVESTA GROUP