نرخی زێڕ جارێکی دیکە بەرزبووەوە

ئەمڕۆ یەک ئۆنسە زێڕ بە 2 هەزار و 731 دۆلار مامەڵەی پێوەدەکرێت، پێشبینیش دەکرێت نرخەکەی بەرزتر ببێتەوە.
دوێنێ نرخی یەک ئۆنسە زێڕ تاوەکو 2 و 740 دۆلار بەرزبووەوە، دواتر نزیکەی 20 دۆلار دابەزی، بەڵام ئەمڕۆ دووبارە بەرزبووەتەوە و گەیشتووەتە 2 هەزار و 731 دۆلار، سیتی بانکی ئەمریکاش، پێشبینیی دەکات نرخی یەک ئۆنسە زێڕ لە ماوەی 3 مانگی داهاتوودا بۆ 2 و  800 دۆلار بەرزببێتەوە و لە ماوەی 6 تاوەکو 12 مانگدا بگاتە 3000 دۆلار.
بانکەکە رایگەیاندووە ئەگەر بانکی ناوەندیی ئەمریکا بەردەوام بێت لە کەمکردنەوەی سوودی بانکی، هەروەها رەوشی بازاڕەکانی ئەمریکا بەرەو خراپیی بڕوات و خواستی وڵاتە گەورەکان بۆ کڕینی زێڕ بەتایبەتی لە چین بەرزبێتەوە، ئەوا پێشبینییەکانی بانکەکە دێنەدی.
وەک سیتی بانک  روونیکردووەتەوە، شەڕ و ئاڵۆزییەکانی رۆژهەڵاتی نێوەڕاست هۆکارێکی سەرەکی بەرزبوونەوەی نرخی زێڕە.