له‌ بودجەی 2025 ی عێراق ئەگەری کورتهێنان هەیە

عەتوان عەتوانی سەرۆکی لیژنەی دارایی لە ئەنجومەنی نوێنەرانی عێراق رایگەیاند، حکومەت سەرقاڵی ئامادەکردنی خشتەی بودجەی 2025ە و ئەگەری کورتهێنان هەیە.

عەتوان عەتوانی باسی لەوەشکردووە، حكومەت دەستی  بە ئامادەكردنی خشتەكانی بودجەی ساڵی 2025 کردووە، کە ئامانجی بەدیهێنانی گەشەپێدان و زیادكردنی داهاتە نانەوتییەكان و سەقامیگری زیاترە لە ئابووری وڵاتدا.

باسی لەوەشکرد، بودجەی بەكاربردن خەریكە درێژدەبێتەوە بۆ بودجەی وەبەرهێنان، ئەوەش بارگرانی بۆ بودجە زیاد دەكات و ئامانجەكانی سنوردار دەکات، بۆیە پێویستمان بە داهاتی نانەوتی زیاترە.

وتیشی، حكومەت لە گێڕانەوەی ئەو قەرزە دەرەكییانەی لەسەریەتی بەردەوامە، لەبەرامبەر ئەوەدا چەندین پرۆژەی خزمەتگوزاری چووەتە بواری جێبەجێکردنەوە، بەشێكی دیکەش لە قۆناغی دەستپێكردندان كە ئەمانەش کاریگەریی هەبووە لەسەر بودجە و خەرجییەكانی هەر بۆیە چاوەڕێ دەکرێت هاوشێوەی پار کورتهێنان لە بودجەدا هەبێت.