عێراق کۆتاییهاتنی دروستکردنی 400 كیلۆمەتر دیواری کۆنکرێتی لە سنوری سوریا ڕادەگەیەنێت

وتەبێژی ئۆپەراسیۆنە هاوبەشەکانی عێراق رایگەیاند، لەكۆی 615 كیلۆمەتر سنوری هاوبەشی نێوان سوریا و عێراق، دیواری کۆنکرێتی بە درێژایی 400 كیلۆمەتری تەواو بوە.
تەحسین خەفاجی، وتەبێژی ئۆپەراسیۆنە هاوبەشەکانی عێراق لە ڕایگەیەندراوێكدا بڵاویكردەوە، هەریەكە لە وەزارەتەکانی ناوخۆ و بەرگری و  فەرماندەیی ئۆپەراسیۆنە هاوبەشەکان و هێزەکانی حەشدی شەعبی ڕێوشوێنی توندیان گرتەبەر بۆ پاراستنی سنورەكان و توانییان ئاسایشی سنورەكان بەهێزتر بکەین.
ئاماژەی بەوەشكردووە، ویستێك هەیە بۆ زیادکردنی هێز لەو ناوچانە، ئەوە جگە لەوەی هێزە ئەمنییەکان بە درێژایی كات لە ڕێگەی هەوڵە هەواڵگرییەکانەوە بەدواداچون بۆ شانە نوستوەکان دەكەن، هەروەها سەقامگیری سنوری عێراق و سوریا بەلای ئەوانەوە زۆر گرنگە و ڕێگە نادەن هیچ پێشێلکارییەک ڕوبدات.
خەفاجی باسی لەوەشكردووە، "کارکردن لەسەر دیواری کۆنکرێتی بەدرێژایی سنوری 615 كیلۆمەتر بەردەوامە، لەگەڵ 400 كیلۆمەتر تەواو بوەو 210-215 كیلۆمەتری دیكە کە دەمێنێتەوە لە ناوەڕاستی ساڵدا تەواو دەبێت و هیچ بۆشایییەکی ئەمنی لەسەر سنورە نامێنێت".