جێگری سەرۆکی هەرێم پێشوازی لە جێگری کونسوڵی گشتیی ئەرمینیا دەكات

ئەمڕۆ دوو‌شەممه‌ شێخ جەعفەر شێخ مستەفا، جێگری سەرۆکی ھەرێمی کوردستان پێشوازیكرد له‌ ئەندرانیک هاروتیونیان، جێگری کونسوڵی گشتیی ئەرمینیا و کاربەڕێکەری کونسوڵگەری ئەرمینیا ، کە بە مەبەستی ماڵئاوایی و تەواوبوونی ئەرکەکەی سەردانی جێگری سەرۆکی هه‌رێمی كوردستانی کردبوو.

 لە دیدارەکەدا، جێگری سەرۆک سوپاس و پێزانینی خۆی پێشکەش بە ئەندرانیک هاروتیونیان کرد، لە بەرامبەر ئەرک و هەوڵەکانی لەپێناو برەودان بە پەیوەندییەکانی نێوان وڵاتی ئەرمینیا لەگەڵ هەرێمی كوردستان، هەروەها هیوای سەرکەوتنی لە کاری داهاتوودا بۆ خواست.

لای خۆیەوە جێگری کونسولی گشتیی ئەرمینیا، سوپاسی هاوكاریی و هەماهەنگیی لایەنە پەیوەندیدارەكانی هەرێمی كوردستانی كرد و جەختی لە بەردەوامبوون و برەودانی زیاتری پەیوەندییەکانی نێوان وڵاتەکەی لەگەڵ عێراق و هەرێمی کوردستاندا کردەوە.