ئەمڕۆ دانیشتنی دادگای فیدراڵی عیراق لەبارەی چەند بابەتێکی چارەنوسسازەوە بەڕێوەدەچێت

ئەمڕۆ دانیشتنی دادگای فیدراڵی بۆ گفتوگۆکردن لەسەر 13 سکاڵا بەڕێوەدەچێت، شەش لەو سکاڵایانە تایبەتن بە سێ یاسا مشتومڕاوییەکە، کە لە ناویاندا یاسای گەڕانەوەی موڵک و ماڵ بۆ خاوەنە رەسەنەکانیان هەیە و کورد پشتیوانی لە یاساکە دەکات.
چوار سکاڵای دیکەش تایبەتە بە هەرێمی کوردستان و دووانیان لەسەر یاسای وەزارەتی شەهیدان و ئەنفالکراوان و ئەوانی دیکە لەسەر رێکارەکانی هاوسەرگیریی دووەم و سزای کامێرای تیژڕەویی تۆمارکراون.
یەکێک لە سکاڵاکان لەسەر سەرۆکوەزیرانی هەرێمی کوردستان و وەزیری ناوخۆ تۆمار کراوە، کە سکاڵاکار دەڵێت، وەرگرتنی باج و رسوماتەکان بە گوێرەی یاسای ژمارە 86ـی ساڵی 2004 تایبەت بە تۆماری ئۆتۆمبێل نایاساییە و وەزیری ناوخۆ دەسەڵاتی ئەوەی نییە سزاکان کەم و زیاد بکات و سزادانی شۆفێر بەهۆی خێراییەوە زیاتر لە جارێک لە یەک کات و شەقامدا نایاساییە، چونکە لەسەر یەک سەرپێچی نابێت کەسێک دووجار سزابدرێت.
سکاڵایەکی دیکەی پەیوەست بە هەرێمی کوردستان، لەسەر سەرۆکی پەرلەمان تۆمارکراوە و سکاڵاکار دەڵێت، ناوی وەزارەتی کاروباری شەهیدان و ئەنفالکراوان نایاساییە و پێویستە بکرێتە دامەزراوەی شەهیدان و ناوی ئەنفالکراوانی لێبکرێتەوە.