وەزارەتی پێشمەرگە: زیاتر لە نۆ هەزار پێشمەرگە و پلەدار فەرمانی پێدانی زەوییان بۆ دەرچوو

وەزارەتی پێشمەرگەی حکومەتی هەرێمی کوردستان رایگەیاند، لە کۆی 18 هەزار و 879 پلەدار و پێشمەرگە، کە ناوەکانیان بۆ وەرگرتنی زەوی بەرزکراوەتەوە، نۆ هەزار و 165 ئەفسەر و پیشمەرگە ناوەکانیان بۆ وەرگرتنی زەوی گەڕاوەتەوە.
لەراگەیەندراوێکی وەزارەتی پێشمەرگەدا هاتووە، پرۆسەی دابەشکردنی زەوی بەردەوام دەبێت، بۆیە داوا لە هەموو ئەو هێز و یەکانەی وەزارەتی پێشمەرگە دەکەن، تاوەکو ئێستا فۆڕمەکانیان تەواونەکردووە لە رێکخستن و بەداتاکردنی فۆڕمەکانیان و ناردنیان بۆ لیژنەی زەوی لە  وەزارەت پەلەبکەن، بۆ ئەوەی زۆرترین پێشمەرگە لەو پرۆسەیە سوودمەندبن.
لە مانگی ئازاری رابردوودا حکومەتی هەرێمی کوردستان بڕیاریدا زەوی بە هەموو ئەو فەرمانبەر و خانەنشینانە بدات، تاوەکو ئێستا لە وەرگرتنی زەوی سوودمەند نەبوون و هەشت ساڵ خزمەتیش وەک مەرجی پێدانی زەوی بەفەرمانبەران دیارییکرا.