حکومەتی عیراق: هیچ گۆڕانکارییەک لە وادەی کشانەوەی هێزەکانی ئەمریکا نەکراوە

وتەبێژی حکومەتی عێراق ڕایدەگەیێنێت، هیچ گۆڕانکارییەک لە وادەی کشانەوەی هێزەکانی هاوپەیمانی نێودەوڵەتی له عێراق ڕووینەداوە.
باسم عەوادی، وتەبێژی فەرمی حکومەتی عێراق بە ڕۆژنامەی سەباحی ڕاگەیاند: ئەو وادەیەی لەلایەن لیژنەی باڵای سەربازیی لە نێوان عێراق و هێزەکانی هاوپەیمانی نێودەوڵەتیی ڕێککەوتوون لەسەر کراوە، وەک خۆیەتی و هیچ گۆڕانکارییەکی بەسەردا نەهاتووە.
مانگی ئەیلوولی ساڵی ڕابردوو، عێراق و ئەمریکا ڕێککەوتن لەسەر کۆتاییهێنان بە ئەرکی هاوپەیمانی نێودەوڵەتی بۆ بەرەنگاربوونەوەی داعش لە عێراق لە کۆتایی مانگی ئەیلوولی 2025.
پەیوەست بە پەیوەندییەکان لەگەڵ سووریا عەوادی ڕایگەیاند، عێراق و حکومەتەکەی لە پێش هەموویانەوە بوون لە گرنگیدان بە دۆخی نوێی سووریا، لە بەغداشەوە ئاماژەگەلێک هەبوون بۆ پێشوازی و ئامادەیی بۆ هاوکاریکردنیان، گرنگترینیان بڕیاری جددی عێراق بووە بۆ دەستوەرنەدان لە کاروباری ناوخۆی سووریا.