ترەمپ: ئۆکرانیا بە هەڵگیرسانی جەنگ تۆمەتبار دەکات

دۆناڵد ترەمپ سەرۆکی ئەمریکا حکومەتی ئۆکرانیا بە هۆکاری لەشکرکێشی سوپای ڕوسیا بۆ وڵاتەکە تۆمەتبار دەکات و ڕایگەیاندووە، ئۆکرانیا بەرپرسیارە لە جەنگ و هێرشی ڕوسیا، کە نزیکەی سێ ساڵ بەردەوامە.
ئەو هەڵوێستەی ترەمپ هاوکاتە لەگەڵ دانوستانی وەزیرانی دەرەوەی ئەمریکاو ڕوسیا لە ڕیاز سەبارەت بە ئاساییکردنەوەی پەیوەندییەکانی واشنتن و مۆسکۆو هەنگاونان بەرەو ئاگربەستی جەنگی ئۆکرانیا.
لە وەڵامی ڕەخنەکانی ئۆکرانیا کە بانگهێشتی دانوستانەکانی ڕیاز نـەکرابوو، ترەمپ ڕایگەیاند: ئۆکرانیا نزیکەی سێ ساڵە لە جەنگێکدایە کە دەکرا ڕێککەوتن بکات لە بری شەڕ.
ترەمپ ئاماژەیداوە، ئەگەر لە کاتی هەڵگیرسانی جەنگەکەدا، لە دەسەڵاتدا بووایە، دەیتوانی ڕێککەوتنێک بکات و ئۆکرانیا بپارێزێت بەبێئەوەی کەس بکوژرێت و هیچ شارێک وێران بکرێت.
لە درێژەی قسەکانیدا ئاشکرایشیکرد: دەمەوێت ئاشتی بەدەستبهێنم و  نامەوێت قوربانی زیاتر هەبێت.
هەروەها ترەمپ داوایکرد هەڵبژاردن لە ئۆکرانیا بکرێت، ئەو داواکارییە لەلایەن ڕووسیاشەوە پێشکەشکراوە، وتیشی: ئەمە تەنیا داوایەکی ڕوسیا نــییە، بەڵکو من و زۆرێک لە وڵاتانی دیکەش هەمان داواکاریمان هەیە.