كۆمپانیای BP به‌ریتانی چوار کێڵگەی سەرەکی نه‌وتی کەرکوک په‌ره‌پێده‌دات

ئابوری
19:28 - 2025-02-25


عێراق ڕێککەوتنی پەرەپێدانی چوار کێڵگەی سه‌ره‌كی نه‌وت له‌ كه‌ركوك، كه‌ پێكهاتوون (بای حەسەن، کەرکوک بەهەردو (بابا و ئاڤانا) و چەمبۆر و خەباز) لەگەڵ کۆمپانیای بریتش (پترۆلیۆم/‏BP)ی به‌ریتانی ئیمزاكرد.

به‌پێی راگه‌یه‌ندراوێكی نوسینگەی محه‌مه‌د شیاع سودانی سەرۆک وەزیرانی عێراق، "بە سەرپەرشتی و ئامادەبونی سه‌رۆك وه‌زیران لە بەغدا ڕێککەوتنێک بۆ نوێكردنه‌وه‌و پەرەپێدانی چوار کێڵگەی نه‌وتی کەرکوک، لەنێوان کۆمپانیای نەوتی باکوری سەر بە وەزارەتی نەوت و کۆمپانیای بریتش پترۆلیۆم/‏BPی بەریتانی ئیمزاکراوه‌".

له‌ راگه‌یه‌ندراوه‌كه‌دا ئاماژه‌ بۆئه‌وه‌شكراوه‌:"ئیمزاکردنەكه‌ دوای ڕێککەوتنێک دێت لەگەڵ کۆمپانیای پەیوەندیدار، سەبارەت بە پرسە تەکنیکییەکان و مەرجەکانی گرێبەست، لەسەر بنەمای ئەو یاداشتانامە لێکتێگەیشتنانەی کە لە لەندەن وئیمزاکراون، لە میانی سەردانەکەی ئەم دواییەی سەرۆکی ئەنجومەنی وەزیران بۆ بریتانیا، کە ئامانج لێی دەستەبەرکردنی باشترین مەرج و سوودی گرێبەستە بۆ لایەنی عێراقی، دوای دانوستانێکی وردی درێژخایەن."
  
باس له‌وه‌شكراوه‌ كه‌:" ئامانجی رێككه‌وتنه‌كه‌ وەبەرهێنانی باشتره‌ بۆ وزە و دابینکردنی نەوتی خاو بۆ پاڵاوگەکانی باکور و کەمکردنەوەی پشتبەستنیان بە نەوتی باشوور كه‌ پەرەپێدانی هه‌ر چوار کێڵگەی سەرەکی (بای حەسەن، کەرکوک بەهەردو (بابا و ئاڤانا) و چەمبۆر و خەباز) له‌خۆده‌گرێت.
 
هه‌ر به‌پێی راگه‌یه‌ندراوه‌كه‌ :" پڕۆژەكە دەستی کار لە پسپۆڕییە جیاوازەکان و کارپێکردنی کۆمپانیا ناوخۆییەکان و جێبەجێکردنی پڕۆژەکانی سوودی کۆمەڵایەتی و پەرەپێدانی تواناکانی سەرچاوە ئەندازیاری و تەکنیکییەکان و پاڵپشتیکردنی ستافی کۆمپانیای نەوتی باکور و کۆمپانیای غازی باکور لەخۆدەگرێت، لە چوارچێوەی دیدگای حکومەت بۆ پڕۆگرامەکانی ڕاهێنان و بەرزکردنەوەی ئاستی لێهاتویی لە چوارچێوەی ئەوەی بریتش پترۆلیۆم بە هەماهەنگی لەگەڵ وەزارەتی نەوت دابینی دەکات."

بابەتی لێکچو

Copyright © 2020 Kirkuk Tv All Rights Reserved Designed And Developed By AVESTA GROUP