چرۆ حەمەشەریف: ئیمزای زیاتر لە 120 پەرلەمانتارمان بۆ بەپارێزگابوونی هەڵەبجە کۆکردووەتەوە

نزیکەی دوو ساڵە پرۆژەیاسای بەپارێزگابوونی هەڵەبجە لە ئەنجوومەنی نوێنەران دەنگی کۆتایی لەسەر نەدراوە و ئەندامێکی ئەنجومەنەکەش دەڵێت کە دەنگمان بە سەرۆکی ئەنجومەنی نوێنەران دا، یەکێک لە مەرجەکانمان بەپارێزگابوونی هەڵەبجە بووە و ئێستا پێی راگەیاندووین پرۆژەکە تێدەپەڕێنین.
چرۆ حەمەشەریف، ئەندامی ئەنجومەنی نوێنەرانی عێراق رایگەیاند، ئێمە بۆ دەنگدان لەسەر بەپارێزگابوونی هەڵەبجە، چەندنجار نوسراومان ئاراستەی سەرۆکایەتیی ئەنجومەنی نوێنەران کردووە و سێ هەفتە لەمەوپێشیش، ئیمزای زیاتر لە 120 پەرلەمانتارمان بۆ ئەو مەبەستە کۆکردووەتەوە و رادەستی سەرۆکایەتییەکەمان کردووە.
وتیشی، لە دانیشتنەکانی رابردوودا، ژمارەیەکی زۆر لە پەرلەمانتارانی لایەنەکانی دیکە؛ جگە لە کورد، نەدەهاتنە ناو هۆڵی ئەنجومەنی نوێنەران، بۆیە ئێمەش نەماندەتوانی داوابکەین پرۆژەیاساکە لەناو بەرنامەی کاردا بێت.
چرۆ حەمەشەریف ئاشکراشی کرد ئێمە کە دەنگمان بە مەحمود مەشهەدانی، سەرۆکی ئەنجومەنی نوێنەراندا، یەکێک لە مەرجەکانمان بەپارێزگابوونی هەڵەبجە بوو و خودی سەرۆکی ئەنجومەنی نوێنەرانیش وتویەتی، هیچ لارییەکمان نییە و هاوکاریشتان دەکەین، چەند رۆژێک پێش ئێستاش، مەشهەدانی پێی راگەیاندین، ئەگەر لایەنەکان ئامادەبن، ئێمەش ئامادەین ئەو پرۆژەیە تێبپەڕێنین”.
جەختیشیکردەوە چاوەڕێ دەکەین پێش 16ـی 3، پرۆژەیاساکە بخرێتە بەرنامەی کارەوە.