بەڕێوەبەری گشتیی پەیوەندییەکان و رێکخراوە نێودەوڵەتییەکان لە سەرۆکایەتیی کۆماری عێراق، رایگەیاند، بڕیاری دادگای فیدراڵی لەبارەی مووچە دەرچووە و دادگا داوای تەوتینی مووچە دەکات.
هاوڕێ تۆفیق بەڕێوەبەری گشتیی پەیوەندییەکان و رێکخراوە نێودەوڵەتییەکان له لێدوانێكی رۆژنامه‌وانیدا رایگەیاندووه:"دوای ئەوەی 20ـ ی کانوونی دووەمی 2025 لە دادگای فیدراڵی داوانامەی یاساییان تۆمارکرد، بۆ داکۆکیکردن لە مووچەی خەڵکی کوردستان، دادبینی یەکەم و و دووەم تەواو بوو، حوکمی تیا دەرچوو."
ئاماژەی بۆئەوەشکردووه:" دادگای فیدراڵی داوای تەوتینی مووچە دەکات بە گوێرەی رێنمایی بانکی ناوەندی و بانکە حکومیی و ئەهلییەکان بگرێتەوە، بەوەی فەرمانبەران ئازادبن لە هەڵبژاردنی بانکەکان، ئەمەش لە رێگای وەزارەتی دارایی حکومەتی هەرێم لەگەڵ وەزارەتی دارایی فیدراڵ بکرێت."
روونشیكردووه‌ته‌وه:" لە بڕیارەکەدا بڕیاری پێشووی دادگای فیدراڵی لەبارەی مووچەوە دووپاتکراوەتەوە و دەشڵێت نابێت کێشەکانی نێوان حکومەتی فیدراڵ و هەرێمی کوردستان ببن بە هۆکاری خەرجنەکردنی مووچەی فەرمانبەران."
هاوڕێ تۆفیق ده‌ڵێت:" "داوای دەرکردنی فەرمانسالاریمان کردبوو، دادگا بۆ ئەم بڕگەیەیان بۆچوونی وابوو رەهەندی بەپەلەی تێدا نییە و پێشتر بڕیاریان دەرکردوە، هەربۆیە ئەم بڕگەیەی رەتکردوە".
گوتیشی "داوامان کردبوو تێچووی دەرهێنانی نەوتی کوردستان لە یاسای بودجە ماددەی 12 بڕگەی (ج) بە نادەستووری دابنێن، بەڵام دوو هەفتە لە داواکەی ئێمە، پەرلەمان خۆی هەمواری ئەو بڕگەیەی کرد کە ئێمە داوامان کردبوو، بۆیە ئەو بڕگەیەمان کێشایەوە ".
جەختشدەکاتەوە:" سەرۆککۆمار و سەرۆکایەتیی کۆمار پشتیوانیی هەردوو حکومەتی فیدراڵ و هەرێمی کوردستان دەبێت و وەکو چەترێکی نیشتمانی داکۆکی لە مافی هەموو خەڵک بە جیاوازی دەکات و داوای یەکگرتوویی و برایەتی لە هەموو لایەک دەکات."
Copyright © 2020 Kirkuk Tv All Rights Reserved Designed And Developed By AVESTA GROUP