جێگری سەرۆکی هەرێم لەگەڵ فەرماندەی سەربازیی هێزی هاوپەیمانی ئیتاڵیا کۆبووەوە

کوردستان
17:53 - 2025-03-24

 

ئەمڕۆ دووشەممە ٢٠٢٥/٣/٢٤ شێخ جەعفەر شێخ مستەفا، جێگری سەرۆکی هەرێمی کوردستان پێشوازی لە کۆلۆنێڵ لوکا ڤێلزیک، فەرماندەی سەربازیی هێزی هاوپەیمانی ئیتاڵیا کرد.
لە كۆبوونەوەکەدا جێگری سەرۆک، جەختی لە پەیوەندییەکانی ئیتاڵیا لەگەڵ هەرێمی کوردستان کردەوە، هەروەها ڕۆڵی هێزی ئیتاڵیای لە چوارچێوەی هاوپەیمانیی نێودەوڵەتیی دژ بە داعش و هاریکاریی و یارمەتییە سەربازییەکانی، بەتایبەت مەشق و ڕاهێنانەکانیان بە پێشمەرگە بەرز نرخاند.
لای خۆیەوە کۆلۆنێڵ لوکا ڤێلزیک، بەردەوامبوونی پشتگیریی و هاریكارییە سەربازییەکانی هێزی ئیتاڵیای بۆ پێشمەرگە دووپات كردەوە، هەروەها ئۆپەراسیۆنە هاوبەشەکانی نێوان پێشمەرگە و سوپای عێراق و هێزی هاوپەیمانانی لەو ناوچانەی کە داعش خۆی تێدا حەشار داوە، بە گرنگ زانی.
دوایین پێشهاتەکان و بارودۆخی سیاسیی و ئەمنی ناوچەکە، چاکسازییەکانی وەزارەتی پێشمەرگە و خێراکردنی پڕۆسەی یەکخستنەوەی پێشمەرگە، تەوەرێکی دیکەی گفتوگۆکان بوو.

بابەتی لێکچو

Copyright © 2020 Kirkuk Tv All Rights Reserved Designed And Developed By AVESTA GROUP