جێگری سەرۆکی هەرێم هاریكارییە سەربازییەکانی ئیتاڵیای بۆ پێشمەرگە بەرزنرخاند

 
ئەمڕۆ چوارشەممە ٢٠٢٥/٣/٢٦ شێخ جەعفەر شێخ مستەفا، جێگری سەرۆکی ‏هەرێمی کوردستان پێشوازی لە نیکۆلۆ ڤینێلا، فەرماندەی سەربازیی هێزی تایبەتی ئیتاڵیا بۆ مەشق و ڕاهێنان کرد، کە بەمەبەستی ماڵئاوایی و تەواوبوونی ئەرکەکەی سەردانی ‏جێگری سەرۆکی هەرێمی کردبوو.

لە دیدارەکەدا جێگرى سەرۆکی هەرێم سوپاسی ئەرک و ماندووبونەکانی نیکۆلۆ ڤینێلای لە ماوەی رابردوودا کرد و هیوای سەرکەوتنی لە کاری داهاتوودا بۆ خواست، هەروەها هاریكارییە سەربازییەکانی ئیتاڵیای لە پەرەپێدانی توانا سەربازییەکان و دامەزراندنی بنکەی سەربازیی تایبەت بە مەشق و ڕاهێنان بۆ پێشمەرگەی لە هەرێمی کوردستان و ناوچەکە بەرز نرخاند.

لای خۆیەوە نیکۆلۆ ڤینێلا، سوپاسی پاڵپشتی و هاریكاریی لایه‌نه‌ پەیوەندیدارەكانی هەرێمی كوردستانی له‌ كار و ئەرکەکانیدا كرد و بەردەوامبوونی تیمەکەیانی لە مەشق و ڕاهێنانەکان بۆ هێزی پێشمەرگە دووپات کردەوە.