مامۆستا یوسف سەعید کۆچى دواییکرد

مامۆستا یوسف سەعید  ئەحمەد رەشید جاف لە تەمەنى 82 ساڵیدا کۆچى دواییکرد ، کۆچکردوو لە ماوەکانى ڕابردوودا بۆماوەى 9 ساڵ بەڕێوەبەرى پەروەردەى خوێندنى کوردى بوو لەشارى کەرکوک.

وێستگەکانى ژیانى مامۆستا یوسف سەعید :

 ناوی تەواوی( یوسف سەعید ئەحمەد رەشید جاف )
ــ لە ساڵی ۱۹٤۳ لە شاری کەرکوک لە دایک بووە.
ــ لە ساڵی ۱۹٤۹ چۆتە بەر خوێندن لە قوتابخانەی غازی سەرەتایی.
ــ لە ساڵی ۱۹٥۹ خوێندنی ئامادەیی لە دواناوەندی کەرکوک  تەواوکردووە.
ــ لە بەشی ئینگلیزی کۆلێجی ئادابی زانکۆی بەغدا وەرگیراوە، لە ساڵی ۱۹٦۳ بە پلەی (باشە) لە بەشەکەی دەرچووەو خوێندنی زانکۆی تەواوکردووە. بەڵام لە سەردەمی بەعس لە دوای کودەتای ۸ی شوباتی ۱۹٦۳ دایاننەمەزراندووە.
ــ هەرلە ساڵی۱۹٦۳ لە لایەن چەتەکانی بەناو (حەرەس قەومی) ،لە بەغدا بۆ ماوەی ۲۰ رۆژ لە بارەگای نادی ئۆڵمپی لە ئەعزەمیە، کە نیشتمانپەروەرانیان تیا دەستبەسەر دەکرد،دەستگیرکراوە.. دوای ئازادکردنی گەڕاوەتەوە کەرکوک. دیسان لە کەرکوک دەستگیرکراوەتەوە. ئەمجارە دوای بەربوونی بڕیاری داوە عێراق جێبهێلێت و چۆتە وڵاتی شانشینی سعودیە،لەوێ وەکو مامۆستا لە پەیمانگەی مامۆستایان لە شاری مەکە دامەزراوەو ماوەی سێ ساڵ ماوەتەوە. دوای ئەم ماوەیە گەڕاوەتەوە عێراق وبەڵگەنامەکانی پێشکەش بە ئەنجومەنی راژە کردووە لە بەغداو لە ۷-۱۱-۱۹٦۷ وەکو مامۆستا لە ئامادەیی موسەڵڵا لە کەرکوک دامەزراوە.
ــ لە ۱-۹-۱۹۷۱ بۆتە یاریدەدەری ناوەندی کاوە لە کەرکوک.
ــ لە ئەیلولی ۱۹۷۲ بۆتە بەڕێوەبەری دواناوەندی شۆرجە، دوایی بۆتە بەڕێوەبەری دواناوەندی ئێوارانی سەندیکای مامۆستایان.
ــ لە ئەیلولی ۱۹۷٥ کراوە بە مامۆستا لە ئامادەیی کەرکوک..
ــ لە۱-۱۱-۱۹۸۳ بەهۆی سەرکەوتویی وەکو مامۆستای زمانی ئینگلیزی،پاڵێوراوە بۆ سەرپەرشتیاری پسپۆڕی و لەگەل ٦۰ مامۆستای تر لە هاوڕێیانی تاقیکردنەوەی ئەنجامداوەو بە یەکەم دەرچووە.
ــ لەو ماوەیەی کە وەکو سەرپەرشتیاری پسپۆڕی دەستبەکاربووە، پەنجا کۆڕی بۆ مامۆستایانی ئینگلیزی سازکردووە.زیاتر لە بیست خولی بۆ مامۆستایان کردۆتەوە.لە زۆر بواری راهێنان بە مامۆستایان بەشداربووە.
ــ لە ۱-۹-۱۹۹٦ بەهۆی سیاسەتی بە عەرەبکردن وفشاری بەردەوامی دەسەڵاتی بەعس بۆ سەر مامۆستایان،خۆی خانەنشین کردووە.
 ــ لە دوای رووخانی دەسەڵاتی دیکتاتۆری لە عێراق،لە ساڵی ۲۰۰۳ وەکو سەرپەرشتیاری پسپۆڕی لە لایەن وەزارەتی پەروەردەی هەرێم گەڕێنراوەتەوەو دەستبەکاربۆتەوە.
ــ لە ۲٥-۷-۲۰۰۳ لە ئیدارەی نوێی کەرکوک تەکلیفی لێکراوە ئەرکی بەڕێوەبردنی خوێندنی کوردی لە کەرکوک بگرێتە ئەستۆ.
ــ لە ساڵی ۲۰۰٦ بە پێی تەمەن خانە نشین کراوە،بەڵام بە گرێبەست لەسەر ئەرکی بەڕێوەبردنی خوێندنی کوردی ماوەتەوە تاکو ساڵی ۲۰۰۹.
ــ مامۆستا یوسف لە ساڵی ۱۹٦٤ خێزانی پێکەوەناوەو چوارکوڕو کچێکیان هەیە..