وەزیری داد: ئیدارەی کەرکوک بێ جیاوازی خزمەتی هاووڵاتیانی شارەکە دەکات

وەزیری دادی حکومەتی عیراق رایدەگەیەنێت: "ئیدارەی کەرکوک کاربۆ سەرجەم پێکهاتەکانی کەرکوک دەکات و بێ جیاوازی خزمەتی هاووڵاتیانی ئەو شارە دەکات".

د. خالید شوانی وەزیری دادی حکومەتی عیراق لە لێدوانێکی رۆژنامه‌وانیدا رایگەیاند: "ئیدارەی نوێی کەرکوک کاردەکات لەسەر برەودان بە ئاشتی و پێکەوە ژیانی سەرجەم پێکهاتەکان لە کەرکوک".

"ئیدارەی کەرکوک دوورە لە ململانێ سیاسییەکان و بەهەموو توانایانەوە لەپێناو خزمەتکردنی هاووڵاتیان و سەرجەم پێکهاتەکانی شارەکە کاردەکەن و ئێمەش لەیەکێتیی نیشتمانیی کوردستان باوەڕمان بە پێکەوە ژیانی پێکهاتەکان و نەتەوە جیاوازەکان هەیە و سەرسامیشین بە هاودەنگی نێوان پارێزگاری کەرکوک و سەرۆکی ئەنجومەنی پارێزگا و سەرجەم بەڕێوەبەرایەتییەکانی کەرکوک".

ئەوەش دەڵێت: "پارێزگاری کەرکوک بەرنامە و پێشنیارەکانی بافڵ جەلال تاڵەبانی سەرۆکی یەکێتیی نیشتمانی کوردستان جێبەجێدەکات و کەرکوک بەرەو پارێزگایەکی نمونەیی هەنگاو دەنێت و پێشکەوتن و خزمەتکردنی هاووڵاتیان لەسەرەکیترین کارەکانێتی، بۆیە ئێمەش لە حکومەتی فیدراڵ کاردەکەین بۆ ئەوەی هەموو کێشەکانی ئەو پارێزگایە چارەسەر بکەین".