وەزارەتی کارەبای عیراق: پێویستمان بە جێگرەوەی غازی ئێرانە

راگرتنی هاوردەی غازی ئێران بۆ عێراق، بووه‌ته‌ هۆی کێشە لە بەرهەمهێنانی کارەباو وتەبێژی وەزارەتی کارەبایش دەڵێت: پێویستیان بە جێگرەوەی ‌غازی ئێرانە.

ئەحمەد موسا، وتەبێژی وەزارەتی کارەبای عێراق، رایگەیاند:" دوو مانگ زیاترە، هەناردەی غاز لە ئێرانەوە بۆ عێراق و پارێزگاکانی ناوەڕاست، ڕاگیراوە، جگە لەو نۆ ملیۆن مەتر سێجایەی بۆ پارێزگاکانی باشوری عێراق هەناردە دەکرا، بەڵام ئەو بڕە پێداویستی پڕناکاتەوە.
وتیشی:" راگرتنی غازی ئێران، کاریگەریی نه‌رێنی کردووەتە سەر وێستگەکانی بەرهەمهێنانی کارەبا لە عێراق و بووه‌تە هۆی کەمبوونەوەی هەشت هەزار مێگاوات کارەبا لە عێراق."

ئەحمەد موسا ئاماژه‌ی بۆئه‌وه‌شكرد كه‌:" بەرهەمی ئێستای كاره‌بای عێراق، 18 هەزار میگاوات و پێداویستیش 32 هەزارە و پلانیان هەیە بۆ وەرزی هاوین بیگەیەننە 28 هەزار مێگاوات، بەڵام پێویستە جێگرەوەی غازی ئێران دابین بکەن".