مۆلەر دوای 25 ساڵ لەگەڵ بایرن میونشین گەیشت بەخاڵى کۆتایی

مۆلەر دوای 25 ساڵ لەگەڵ بایرن میونشین گەیشت بەخاڵى کۆتایی
ئاکۆ بیبانى

لە گوندێکى بچووک بە ناوى  ( پاهل ) نزیک میونشین تۆپى پێى دەکرد و مامۆستاکەى درکەى بە بەهرە زۆرەکەى  کرد و نامەیەکى بۆ بایرن نوسى و داوای لێکردن تاقیکردنەوەى بۆبکەن، لەو کاتەدا تۆماس مۆلەر رۆشتە ئەکادیمای بایرن میونشین لەو کاتەى تەمەنى تەنها 10 ساڵ بوو ، ئەمەش بە دیاریکراوى ساڵى 2000 بوو ، ئیدى ئەو یاریزانە بزێوە بووە بەشێک لە شانازییەکانى یانە بافارییەکە و وەک یەکێک لە بەوەفاترین یاریزانەکانى تۆپى پێى سەردەم هەژماردەکرێت ، بەو پێیەى لە 25 ساڵى رابردوودا تەنها درێسى بایرنى پۆشى و ئامادەنەبوو لۆگۆى یانەکەى بەهیچ شتێک بگۆڕێتەوە.
 تۆماس مۆلەر بە ( راومدۆتەر ) ناسراوە کە بەماناى ( دۆزینەوەى بۆشایی ) دێت ، مۆلەر یەکێکە لەهێرشبەرە زیرەکەکان کە زۆر بەووردى بەدوای بۆشایدا دەگەڕا، یاریزانێکى خۆش مەجلیس بوو، هەمیشە حەزى بە گاڵتەکردن بووە ، دوای بردنەوە کەمەرشکێنەکەى بایرن لە بارسا زۆر جار هاندەرانى یانە کەتەلۆنیەکەى توڕەدەکرد !  لە کاروانى وەرزشى خۆیدا زۆر دەسکەوت و نازناوى گرنگى دەستەبەرکردوە ، مۆلەر خاوەنى ( 33 ) نازناوە .
یانەى بایرن میونشین لەسەر پێگەى تایبەت بەخۆى ئەوەى بڵاوکردۆتەوە : بە ویستى هەردوو لا و بە گفتوگۆ و رێکەوتن ، گەیشتون بە خاڵى کۆتایی و چیتر بۆندەکەى هێرشبەرە ئەڵمانیەکە تازە ناکرێتەوە کە کۆتایی ئەم وەرزە کۆتایی دێت .
مۆلەرى 35 ساڵان لەماوەى یاریکردنى چەندین نازناوى گرنگى ناوخۆی و جیهانى دەستەبەرکردوە ، لەگەڵ هەڵبژاردەى ئەڵمانیاش شانازی گەورەى نوسیوەتەوە ، لەسەرووى هەمویانەوە بردنەوەى جامى جیهانى ساڵى 2014 و بەشداریکردن لە شکانە مێژوویەکەى بەرازیل کاتێک بە حەوت گۆڵ بەرامبەر بە گۆلێک سیلیساویان رووخاندو گۆڵى یەکەمى یارییەکەش مۆلەر تۆمارى کرد .
یانەى بایرن ئامادەیە وەک رێزێک لە کاروانە پڕ لەدەسکەوتەکەى ، رێز لە رابردووى ئەستێرەکەى بگرێت و یاریی ماڵئاوایی بۆ ئەنجام بدات .
دەربارەى کۆتایی هاتنى کاروانى وەرزشى لەگەڵ یانەى بایرن موینشین ، تۆماس مۆلەر رایگەیاند : رۆژێکى جیاوازە بۆمن دوای 25 ساڵ دەگەم بەخاڵى کۆتایی ، بەراستى رۆژانێکى خۆش و لە یادنەکراوم لەگەڵ یانەى خەونەکانم بەسەربردوە ، لەگەڵ هاندەران دڵخۆش بووین و ئاهەنگى دەیان سەرکەوتنمان گێراوە ، ئەم هاوینە بۆمن کۆتایی تۆپى پێیە بەراستى گەشتێکى ناوازەو باوەڕپێنەکراوم لە 25 ساڵى رابردوو بەسەربردوە ، بۆهەمیشە شانازى بە یانەى بایرنەوە دەکەم .
کاتێک فان گال راهێنەرى یانە ئەڵمانیەکە بوو ، زۆرێک رەخنەیان لە ئاستى مۆلەر دەگرت ، بەڵام راهێنەرە هۆڵەندیەکە هێندە متمانەى بە تواناکانى هەبوو دەیوت هەمیشە مۆلەر لە تیپەکەى من یارى دەکات .

یواکیم لۆف دەلێت : مۆلەر یاریزانێکى ناوازەیە ، هەمیشە لەشوێنى دروست و گونجاودا دەوەستێت، زۆر ژیر و زیرەکە لە نێو لاکێشەى سەوزدا .

گواردیۆلا دەلێت: مۆلەر یاریزانێکى تایبەتە ، یاریکردن بە بێ مۆلەر وەک ئەوەیە بە بێ دڵ یارى بکەیت .

لێونێل مێسى دەلێت : مۆلەر یەکێکە لەو یاریزانانەى زۆر دەترسام کاتێک بەرامبەرى یاریمان دەکرد  تواناى سەیرى هەیە بۆ دۆزینەوەى بۆشایی .

هانسى فلیک : مۆلەر مامۆستاى تەکنیکە لێوەى فێردەبم لە راهێنانەکان ئەو رابەرێکى راستەقینەیە .

زێدان دەلێت : مۆلەر هیچ کات لەلایەن میدیاکانەوە مافى خۆى پێنەدراوەو گرنگى بە تواناکانى نەدراوە، هەموو راهێنەرێک ئارەزوو دەکات مۆلەر یارى بۆبکات .