رياڵ مەدرید هەوڵى ڕاودونانى بارسا دەدات !

رياڵ مەدرید هەوڵى ڕاودونانى بارسا دەدات !
ئاکۆ بیبانى
دوای کرانە دەرەوەى لە خولى یانە پاڵەوانەکانى ئەوروپا ، ئێستا یانەى ریاڵ مەدرید هەموو فۆکسەکانى لەسەر لالیگایە ، نایەوێت هاوشێوەى چامپیۆنزلیگ لە خولى یانەکانى ئیسپانیاش بەدەستى خاڵییەوە دەرچێت ، لەسەر یاریگاى سانتیاگۆ بێرنابیۆ لە یارییەکى پڕ لە ململانێدا میواندارى یانەى ئەتلەتیک بلباو دەکات ، یانەى شاهانە لە پلەى دووەمى ریزبەندییە و 7 خاڵ لە دوای یانەى قەڵاى سپییەوەیە کە لوتکەى ریزبەندى گرتوە ، نایەوێت جیاوازی خاڵەکانى زۆر بێت هەربۆیە شەڕدەکات لە پێناو ئەوەى ئەمشەو جیاوازیەکە بۆ 4 خاڵ کەمبکاتەوە .
یانەى ریاڵ مەدرید لە یارى چوندا کە لەهەرێمى باسک ئەنجامدرا ، ڕووبەرووى شکستێکى تاڵ بوەوە کاتێک بە دوو گۆڵ بەرامبەر بەگۆلێک کەوتە داوى شکستى بلباوەوە ، ریاڵ مەدرید دوو ئامانجى هەیە ، تۆڵەکردنەوەى یارى چوون و سێ خاڵى یارییەکە و ڕاودونانى بارساى پێشەنگ .
بۆ ئەو یارییە ، یانەى ریاڵ مەدرید بێبەش دەبێت لە تواناکانى ( کارفاخاڵ و مێندى و ئیدێر میلیتاو ) بەهۆى پێکانەوە ، ئەمە جگە لەوەى کیلیان مپاپێ ناتوانێت بەشدارى لە یارییەکەدا بکات ئەویش بەهۆى سزاى راگرتنەوە .
ئەوەى بۆ یانەى ئەتلەتیک بلباو قورس و دژوار و چاوەڕوان نەکراو بوو پێکانى یەکێک لە یاریزانە کاریگەر و بە تواناکانى بوو ، ئەویش ( نیکۆ ولیامز)ى ئیسپانى و هێرشبەرى باڵى یانەکەیە .
ولیامز چەکێکى بەهێزى ئەتلەتیک بلباوە لەم وەرزەدا بەشدارى 42 یارى کردوە لەگەڵ تیپەکەى و 11 گۆڵى کردوەو 7 ئاسیستى هەیە.