تەندروستی سلێمانی ئاماری بریندارانی رووداوەکەی یاریگای نەورۆزی بڵاوكرده‌وه‌

بەڕێوەبەرایەتیی گشتی تەندروستیی سلێمانی ژمارەی بریندارەکانی گرژی و ئاڵۆزییەکانی دوێنی شەوی نێوان هاندەرانی یانەی نەورۆز و زاخۆدا ئاشکرا دەکات و دەڵێت:"  62  هاوڵاتی برینداربوون،  یەکێک لە بریندارەکان نەشتەرگەریی بۆ کراوە".

ئەمڕۆ چوارشەممە 23/4/ 2025، تەندروستیی سلێمانی لە راگەیەندراوێکدا، ئاماژەی بەوەکردووە:" تیمەکانی فریاكەوتنی خێرا، لە شوێنی رووداوەكە لە یاریگای نەورۆز چارەسەری بۆ 25 بریندار كردووە، 27 برینداریشیان بە ئەمبوڵانس گواسترانەوە بۆ نەخۆشخانەی شار و 10 برینداریش لەلایەن كەسوكاریان گەیەندراونەتە نەخۆشخانە".

 بەپێی راگەیەندراوەکە:" سەرجەم بریندارەكانی یاریگای نەورۆز گەڕاونەتەوە بۆ ماڵەوە و تەنیا یەك بریندار نەبێت لە نەخۆشخانە ماوەتەوە كە نەشتەرگەری بۆ كراوە و دۆخی تەندروستیی جێگیرە."

ئێوارەی دوێنی لە یاریی نێوان یانەی نەورۆز و زاخۆ کە لە سلیمانی بەڕیوەچوو، گرچی و ئاڵۆزی لە نێوان هاندەرانی هەردوو یانەکە روویدا و کە بەهۆیەوە 62 کەس برینداربوون و لیژنەی لێکۆڵینەوەش پێکهێندراوە بۆ بەدواداچوونی ئەو رووداوە.