جومانە غەلای: زیاتر لە یەک ملیۆن کەس تۆماری بایۆمەترییان نوێکردووەتەوە

وتەبێژی کۆمسیۆنی هەڵبژاردنەکانی عێراق رایگەیاند، زیاتر لە یەک ملیۆن کەس تۆماری بایۆمەترییان نوێکردووەتەوە.

جومانە غەلای وتەبێژی کۆمسیۆنی باڵای سەربەخۆی هەڵبژاردنەکانی عێراق رایگەیاند، هەزار و 79 ناوەند لە عێراق بۆ نوێکردنەوەی تۆماری دەنگدەران کراونەتەوە و تا ئێستا زیاتر لە یەک ملیۆن کەس لە عێراق و هەرێم تۆماری بایۆمەتریی دەنگدانیان بۆ هەڵبژاردنی ئەنجومەنی نوێنەرانی عێراق نوێکردووەتەوە.

بەپێی ئاماری کۆمسیۆن، یەک ملیۆن و 120 هەزار و 647 کەس تۆماری دەنگدەرانیان لە پارێزگاکانی عێراق و هەرێمی کوردستان نوێکردووەتەوە.

بەغداد لە ریزبەندیی یەکەمی پارێزگاکانی عێراقدایە و 232 هەزار و 474 کەس تۆماری بایۆمەتریی دەنگدانیان نوێکردووەتەوە و نەینەواش بە 176 هەزار و 291 کەس لە ریزبەندیی دووەمدایە.

لە هەرێمی کوردستانیش، زۆرترین نوێکردنەوەی تۆماری دەنگدەران لە هەولێر بووە بە 79 هەزار و 935 کەس و لە سلێمانی 57 هەزار و 798 و لە دهۆک 42 هەزار و 946 کەس تۆماری دەنگدەرانیان نوێکردووەتەوە.