سەرۆک کۆمار: پێویسته‌ توانای هێزە چەکدارەکان به‌هێزتر بكرێن

 
 سەرۆک کۆمار د.لەتیف جەمال ڕەشید، ئەمڕۆ چوارشەممە ٢٨ی ئایاری ٢٠٢٥ لەکۆشکی بەغداد، پێشوازیکرد لەبەرپرسی دەزگای دژە تیرۆر،  فەریق کەریم عەبود ئەلتەمیمی.

لەدیدارەکەدا دوایین پێشهاتە ئەمنییەکانی وڵات و ناوچەکە و ڕۆڵی دەزگای دژە تیرۆر لە بەرجەستەکردنی سەقامگیری ناوخۆدا تاوتوێکرا، سەرۆک کۆمار جەختی لە پێویستی بەهێزکردنی توانای هێزە چەکدارەکان کردەوە بۆ ڕووبەڕووبوونەوەی هەڕەشە تیرۆریستییەکان و ستایشی ڕۆڵ و قوربانیە گەورەکانی دەزگای دژە تیرۆری کرد، لە پاراستنی ئاسایش و سەقامگیری عێراق و هەموو عێراقییەکاندا، هاوکات ئاماژەی بە پێویستی پەرەپێدان بە تواناکانی دەزگاکە کرد، لەڕێگەی  سود وەرگرتن لە توێژینەوە و لێکۆڵینەوەی مۆدێرن لە بواری بەرەنگاربوونەوەی تیرۆر و ئایدۆلۆژیا توندڕەوەکاندا .

لەلای خۆیەوە ئەلتەمیمی، سوپاس و پێزانینی خۆی بۆ ڕێنماییەکانی سەرۆک کۆمار دەربڕی و ڕوونکردنەوەیەکی وردی لەبارەی پێشهاتەکانی کارەکانی دەزگای دژە تیرۆر و هەوڵە ئەمنی و هەواڵگرییەکانی و پلانەکانی داهاتووی بەئامانجی پەرەپێدانی ئاستی ئاسایش و سەقامگیری لەعێراقدا خستەڕوو.