دەزگایی میدیایی کەرکوک براوەکانى بالۆن دۆر ئاشکرادەکات !

بەشى وەرزشى و ئامار و داتاکان لە دەزگایی میدیایی کەرکوک بەدواداچوون بۆ باشترینەکانى جیهان دەکات و ناوى ئەو ( 10 ) یاریزانە ئاشکرا دەکات کە پاڵێوراوى سەرەکى بردنەوەى بالۆن دۆر دەبن .

1- عوسمان دێمبڵى
عوسمان دێمبڵى فەرەنسى و هێرشبەرى یانەى پاریس سانجێرمان درەوشاوەترین یاریزانى تۆپى پێە لە جیهاندا ، لوتکەى ئاست بەرزى پێشانداوە ، هاوکارى تیپەکەى کردوە بۆبردنەوەى خولى فەرەنسى و جامى  سوپەرى فەرەنساو بۆ یەکەمجاریش لە مێژوودا لەگەڵ یانە پاریسیەکە  جامى خولى یانە پاڵەوانەکانى ئەوروپایان بەرزکردەوە دێمبڵى ، ( 33 ) گۆڵى کردوەو ( 14 ) ئاسیستى هەیە.

2- رافینیا
رافینیاى بەرازیلى و ئەستێرەى یانەى بارسێلۆناى ئیسپانی لەم وەرزەدا باشترین ئاستى خۆى پێشکەشکردوەو درەوشاوەترین یاریزانى تۆپى پێى بەرازیل و لالیگا بووە ، لەگەڵ یانەکەى نازناوەکانى ( سوپەرى ئیسپانى و لالیگا و جامى شاى ) بردۆتەوە  ( 31) گۆڵى کردوەو ( 19 ئاسیستى ) هەبووە .

3-  محەمەد سەڵاح
محەمەد سەڵاحى میسرى و هێرشبەرى یانەى لیڤەرپولى ئینگلیزى لەسەرەتاى وەرزەوە ئاستێکى خەیاڵى پێشکەش کرد ، دواتر ووردە ووردە پاشەکشەى کرد ، سەربارى ئەوەى (34 ) گۆڵ و ( 22) ئاسیستى کردوە ، کرانە دەرەوەى رێدز لە قۆناغى شانزەى چامپیۆنزلیگ چانسى یاریزانەکەى بۆبردنەوەى بالۆن دۆر کەمکردۆتەوە هەر چەندە یانەکەى بووە پاڵەوانى ( پرێمەرلیگ )

4- لامین یامال
لامین یامال بچووکترین ئەستێرەى تۆپى پێى جیهان و یانەى بارسێلۆنایە ، کاریگەرترین یاریزان بووەو فۆکسى جیهانى لەسەربووە ، بەو تەمەنە کەمەیەوە (53) یارى ئەنجامداوەو ( 17 ) گۆڵى کردوەو خاوەنى ( 24 ) ئاسیستە ، شانبەشانى رافینیا ( سوپەرى ئیسپانى و لالیگا و جامى شاى ) بردۆتەوە .

5- کیلیان ئمپاپێ
کیلیان ئمپاپێ ئەستێرە ناوازەو ئاسکە ڕەشەکەى مەدرید ، سەربارى ئەوەى لە ڕووى تیمەوە وەرزێکى خراپیان بەسەربرد ، بەڵام لەسەر ئاستی تاک ، مێژوویەکى جوان و پڕ لەشانازى بۆخۆى نوسیەوەو بووە ئەستێرەى یەکەمى شاهانە ، لەم وەرزەدا خاوەنى ( 39 ) گۆڵ بوو ، بەدەر لەوەى ( 4 ) ئاسیستى کردوە ، لەگەڵ ریاڵ مەدرید ( جامى سوپەرى ئەوروپی و جامى کۆنتینتاڵ )ى دەستەبەرکرد.

6- هارى کەین
هارى کەین ئەو ئەستێرەى لەگەڵ پەیوەندى کردنى بە یانەى بایرن میونشینەوە ئیدى دەرگاى نازناوەکانى بۆکرایەوە ، کەین هێرشبەرێکى ناوازەو ترسناکى یانە باڤاریەکەیە و ئەم وەرزە بوونە پاڵەوانى ( خولى یانەکانى ئەڵمانیا ) شازادە هارى توانى ( 36 ) گۆڵ بکات و  (12 ) ئاسیست بۆ هاوڕێکانى بکات .

7- لاوتارۆ مارتێنێز
لاوتارۆ مارتێنێزى ئەرژەنتنى و هێرشبەرى یانەى ئینتەرمیلان چەکێکى کاریگەرى یانە ئیتاڵیەکەیە و لە خولى سیریا ئەى ئاستى ناوازە پێشکەش دەکات و لەگەڵ یانەکەى گەیشتوە بەیارى کۆتایی خولى یانە پاڵەوانەکانى ئەوروپا ، ( 21 ) گۆڵى کردوەو (6) ئاسیستى هەیە .

8- فیکتۆر گیوکێرسى سویدى و هێرشبەرى یانەى سپۆرتینگ لیشبۆنەى پورتوگالى یەکێکە لە هێرشبەرە گۆڵکارو ترسناکەکانى ئەم وەرزەى خولەکانى ئەوروپا و خاوەنى 39 گۆڵە لە خولى پورتوگالى ، لەگەڵ یانەکەى بووە پاڵەوانى خولى ناوخۆى پورتوگال .

9- عومەر مەرموش
عومەر مەرموش شانبەشانى محەمەد سەڵاحى هاونیشتیمانى وەرزێکى نایابی بەرێکرد وەک تاکەکەسى ، لەگەڵ تیمەکەى هیچ ئەنجامێکى نەبوو بەڵام ئەسپ خۆى تاوداو توانى لەڕووى هێرشبەرییەوە خۆى بسەلمێنێت ، یاریزانە گۆڵکارە خاوەنى (28 ) گۆڵ و ( 15) ئاسیستە .


10 – فیتینا
فیتیناى پورتوگالى و ئەندازیارى هێڵى ناوەندى یانەى پاریس سانجێرمانى فەرەنسى یاریزانێکى خێرا و کاریگەى یانە فەرەنسیەکەبوەو رۆلێکى گەورەى گێراوە لە کۆنترۆڵکردنى هێڵى ناوەند ، لەگەڵ یانە پاریسیەکە بووە پاڵەوانى خولى یانە پاڵەوانەکانى ئەوروپا  و خولى یانەکانى فەرەنساو جامى سوپەرى فەرەنسى  لەگەڵ یانەکەى  یەکلاکردەوە .