حەمدیە جاف گه‌ڕێندرایه‌وه‌ بۆ عێراق

دەستەی دەسپاکی عیراق ئاشکرای دەکات :" توانیویانە حەمدیە جاف بەڕێوەبەری پێشووی بانکی عیراقی بۆ بازرگانی TBI بگەڕێننەوە عیراق کە زیانی زۆری بە سامانی گشتی گەیاندووە".

دەستەکە لە راگەیەندراوێکیدا ئاماژەی بەوەکردووە:" دوای هەوڵەکانی دەستەی دەسپاکی توانراوە تۆمەتبار حەمدیە جاف لە خاکی ئیمارات دەستگیر بکرێت و لە رێگای پەیوەندی دیپلۆماسییەوە بگەڕێندرێتەوە عیراق".

ئاماژەی بەوەشکردووە حەمدیە جاف :" لە دادگاکانی عیراق داواکراوە و بەپێی مادەی 340 و 341 تۆمەتبارە، هەروەها بە بێ ئامادەبوونی خۆی 17 سزای بەسەردا سەپێندراوە".

 لە کۆتایشدا، دەستەی دەسپاکی ئاشکرای کردووە:" حەمدییە جاف ئەو کاتەی بەڕێوەبەری گشتیی بانکی عیراقی بۆ بازرگانی (TBI) بووە، زیانی زۆری بە سامانی گشتی گەیاندووە و قەبارەی زیانەکە گەیشتووەتە یەک ملیار و 116 ملیۆن و 24 هەزار و 788 دۆلار".